Тожикистоннинг Конибодом шаҳридаги Фирузоба маҳалласида яшовчи 32 ёшли эркак онасини 136 марта пичоқ уриб ўлдирди. Бу ҳақда ИИВ Суғд вилояти бўйича матбуот котиби Акбар Шарифий хабар берди.
Шарифийнинг маълум қилишича, қўлга олинган Ш.Н ва 65 ёшли марҳума ўртасида 24 ноябрь куни жанжал келиб чиққан. Она ва ўғил ўртасидаги можаро сабаблари маълум қилинмаяпти, Ш.Н тергов тадбирлари давомида онаси қандай вафот этгани ҳақида батафсил гапириб берган.
“У пичоқни олиб, мени урмоқчи бўлиб олдимга келди. Лекин мен ундан пичоқни олиб, юзига бир марта урдим. Кейин қорнига, қўлларига, бўйнига, бошига... Йиқилиб ўлди...”, — дейди у.
Терговда қайд этилишича, айбланувчи онасига 136 марта пичоқ уриб, жиноят изларини яшириш мақсадида аёлнинг қонли кийимини алмаштириб, хонасига олиб бориб, ётқизиб, полдаги қонни ювиб, қотиллик учун ишлатилган пичоқни тозалаган.
“Фақат эртаси куни Ш.Н қариндошларига онасининг кутилмаганда вафот этгани ҳақида хабар берган, бироқ аёлнинг қариндошларидан бирининг сўзларига кўра, марҳуманинг бўйнидаги пичоқ жароҳатлари изларини кўриб, улар “кутилмаган ва тўсатдан ўлим” ҳақидаги версияга ишонмаган”, дейилади ҳисоботда.
Шунингдек, аёл руҳий касалликдан азият чеккан ва 1993 йилдан бери маҳаллий руҳий шифохонада рўйхатга олинган. Эндиликда тергов психиатрик экспертиза орқали Ш.Ннинг руҳий ҳолатини текширади, бироқ у шу пайтгача психиатрлар рўйхатидан ўтмаган.
Айбланувчига нисбатан Тожикистон жиноят кодексининг 104-моддаси билан жиноий иш очилган. Ўта шафқатсизлик билан қотиллик қилгани учун уни 25 йилгача ёки умрбод қамоқ жазоси кутмоқда.
Изоҳ (0)