Ёшга доир нафақа нима ва у кимларга тайинланади?

Пенсия жамғармаси ёшга доир нафақа ҳақида маълумотларни тақдим этди.

Ўзбекистонда ёшга доир нафақа давлат пенсияси 7 йилдан кам иш стажи мавжуд бўлган шахсларга тайинланади.

Ушбу турдаги нафақа эркакларга 65 ёшдан, аёлларга 60 ёшдан берилади. Болаликдан ногиронлиги бўлган фарзанди бор (бўлган) оналарга 55 ёшдан ёшга доир нафақа тайинланади.

Ёшга доир нафақа қонун ҳужжатларда белгиланган миқдорларда тайинланади. Ҳозирги кунда зарур иш стажига эга бўлмаган кекса ёшдаги фуқароларга бериладиган нафақа миқдори — ойига 608 000 сўмни ташкил этади. Ёшга доир нафақа ёшга доир пенсиядан фарқланади ва бу икки атама бир хил тушунча эмас,—дея маълум қилди жамғарма.

Эслатиб ўтамиз, жорий йилнинг 1 декабрь кунидан Ўзбекистонда пенсия ва нафақалар миқдори 7 фоизга оширилди. Хусусан:

• ёшга доир энг кам пенсия миқдори – 725 минг сўм;
• ногиронлик пенсияси миқдори - 800 минг сўм;
• боқувчисини йўқотганлик нафақаси олувчи оиланинг бир нафар аъзосига 608 минг сўм ва кейинги ҳар бир оила аъзосига 212 минг сўмдан;
• ногиронлиги бўлган 18 ёшгача болаларга бериладиган нафақа, 18 ёшдан катта болаликдан ногиронлиги бўлган шахсларга бериладиган нафақа миқдори - 800 минг сўм.

Аввалроқ болалар нафақаси ва моддий ёрдам тайинлаш тартибига бир қатор ўзгартириш ва қўшичалар киритилаётгани хабар қилинганди.