Буюк Британия ҳукумати ёшлар ўртасида руҳий саломатлик билан боғлиқ муаммоларнинг кучайиши фонида 16 ёшгача бўлган болалар учун ижтимоий тармоқлардан фойдаланишни тақиқлаш масаласини кўриб чиқмоқда. Бу ҳақда Times газетаси маълум қилган.
“Бош вазир Риши Сунак болаларнинг ижтимоий тармоқлардан фойдаланишига чекловлар жорий этиш масаласини кўриб чиқмоқда, чунки вазирлар ёшлар орасида руҳий саломатлик муаммолари кўпайиб бораётганидан хавотирда. 16 ёшгача бўлганлар учун барча ижтимоий тармоқлардан фойдаланишни тақиқлаш — кўриб чиқилаётган вариантлардан бири”, — дейилади нашрда чиққан мақолада.
Шу билан бирга, ҳукумат фойдаланувчининг туғилган санасини мажбурий текширишни ва ота-она назоратини кучайтиришни талаб қиладиган технологияларни жорий қилишни ҳам ўрганмоқда.
Нашрнинг таъкидлашича, ижтимоий тармоқлардан фойдаланиш бўйича янги меъёрий ҳужжатларни ишлаб чиқиш дастлабки босқичда, ҳозирда вазирлар олдида ижтимоий тармоқлар ва руҳий саломатликнинг ёмонлашуви ўртасидаги боғлиқликни яхшироқ ўрганиш вазифаси турибди.
Изоҳ (0)