Сирдарё туманида қарзни ундириш учун келган ижрочини тепган эркакка ҳукм ўқилди. Бу ҳақда Олий суд ахборот хизмати хабар берди.
Хабарга кўра, қарздор аёлнинг укаси ундирув жараёнларига дастлаб оғзаки қаршилик кўрсатган. Фойдаси бўлмагач, тасвирга олиб турган ундирувчини тепиб, жароҳат етказган. Сирдарё туманида сайёр суд мажлисида кўрилган мазкур ишда жабрланувчи ундирувчилар ва тепки муаллифи ҳам сўроқ қилинди.
Судланувчи шу куни давлат ижрочилари опаси ва унга нисбатан қўпол муносабатда бўлиб, пул топиб беришни талаб қилаверишганидан асабийлашганини, ҳолатни тасвирга олаётгани сабабли оёғи билан ижрочининг қўлидаги телефонини тепганида ходим жағимга тепди, деб ўзини ерга ташлаб, ваҳима қилганини, орадан вақт ўтиб, қилган ишидан пушаймонлигини, ундирувчилардан кечирим сўраганини билдирди ва суддан енгиллик сўради.
Ушбу ҳолат бўйича тергов ҳаракатлари олиб борилиб, Жиноят кодексининг 219-моддасида (ҳокимият вакилига ёки фуқаровий бурчини бажараётган шахсга қаршилик кўрсатиш) назарда тутилган жиноятни содир этган судланувчига 2 йил муддатга озодликдан маҳрум қилиш жазоси тайинланди.
Изоҳ (0)