Андижонда юклар устини тўсиш учун байроқдан ёпқич сифатида фойдаланган ҳайдовчига чора кўрилди

Ноябрь ойи охирида Андижон вилоятида ҳайдовчи томонидан юклар устини тўсиш учун байроқдан ёпқич сифатида фойдаланилгани ҳақида хабар берилган эди.

Унда автомашина Шаҳрихон туманида истиқомат қилувчи фуқарога тегишли экани, ҳолат бўйича тегишли тартибда ИИБ ҳамкорлигида ҳаракатлар олиб борилаётгани айтилганди.

Андижон вилояти ИИББ ахборот хизматининг “Дарё”га маълум қилишича, ушбу фуқарога нисбатан Жиноят ишлари бўйича Шаҳрихон туман суди томонидан қонуний чора кўрилган.

Маъмурий жавобгарлик тўғрисидаги кодекснинг 203 прим 1-моддаси (давлат рамзлари тўғрисидаги қонунчиликни бузиш) 1-қисми билан базавий ҳисоблаш миқдорининг 3 баравари (1 миллион 20 минг сўм) миқдорида жарима қўлланди, — дейилади ИИББ ахборотида.

Маълумот учун, Маъмурий жавобгарлик тўғрисидаги кодекснинг 203 прим 1-моддаси (давлат рамзлари тўғрисидаги қонунчиликни бузиш) 1-қисми Ўзбекистон ёки Қорақалпоғистоннинг давлат байроғи, давлат герби ёхуд давлат мадҳияси тўғрисидаги қонунчиликни бузиш — фуқароларга базавий ҳисоблаш миқдорининг уч бараваригача (1 миллион 20 минг сўм), мансабдор шахсларга эса — уч бараваридан (1 миллион 20 минг сўм) етти бараваригача (2 миллион 380 минг сўм) миқдорда жарима солишга сабаб бўлади.

Июль ойида Ўзбекистон давлат байроғидан фойдаланиш мумкин бўлган ҳолатлар кенгайтирилган эди.

Унга кўра, қонун билан байроққа нисбатан ҳурматсизлик қилиш ҳолатлари аниқ белгиланди, хусусан:

• байроқдан ва унинг тасвири туширилган белгилардан йиртилган, ифлосланган, тешилган, ранги оқарган ҳолда ва бошқа номақбул тарзда фойдаланиш;
• бирор-бир нарса учун устки ёпинғич сифатида фойдаланиш;
• столларга, ўриндиқларга, стулларга тўшаш ёки тасвирлаш, ундан қоплама сифатида фойдаланиш, ўтириладиган бошқа жойларга ёки оёқ остига тўшаш ёки тасвирлаш;
• кийим-кечак, дастрўмол ёки кўрпа-тўшак сифатида, буюмларни сақлаш ва ташиш учун фойдаланиш;
• байроқ тасвири туширилган белгиларни пойабзал , дастрўмол, кўрпа-тўшак, ички кийим-кечакка, сочиқларга, қутиларга (ўровларга), бир марта фойдаланиш ва ташлаб юбориш учун мўлжалланган буюмларга босиб чиқариш ёки унинг тасвирини бошқача тарзда тушириш;
• байроқ ва унинг тасвири туширилган белгилардан одоб-ахлоқ қоидалари ва жамиятда юриш-туриш қоидаларига зид равишда фойдаланиш мумкин эмас.

Давлат байроғидан ва унинг тасвири туширилган белгилардан белгиланган талабларга мувофиқ фойдаланиш учун масъулият байроқдан фойдаланадиган жисмоний ва юридик шахслар, давлат органлари зиммасига юклатилади.

Давлат байроғи тўғрисидаги қонунга ўзгартириш киритиш

Ўзбекистон байроғидан фойдаланишдаги айрим чекловлар бекор қилиниши мумкинлиги ҳақида хабар берилган эди. 20 июнь куни Олий Мажлис Қонунчилик палатаси депутатлари тегишли қонун лойиҳасини қабул қилган. Олий Мажлис Сенатининг қирқ иккинчи ялпи мажлисида эса давлат байроғидан фойдаланиш имкониятларини кенгайтирувчи қонун муҳокама қилиниб, маъқулланганди.