Олий Мажлис Сенатининг қирқ еттинчи ялпи мажлисида Ногиронлар ассоциацияси раиси томонидан қилинган мурожаат кўриб чиқилган эди. Унда қонунчиликда белгиланган бўлса-да, ассоциация ва унинг ҳудудий бўлинмалари вакилларига қурилиш объектларини қабул қилиш масаласида махсус электрон платформадан фойдаланиш имконияти чеклаб қўйилгани танқид қилинганди.
Айтилишича, ассоциация платформадан электрон калит орқали тўрт ойча фойдаланган, лекин кейинчалик улардан “калит” олиб қўйилган.
Сенат раиси Танзила Норбоева Вазирлар Маҳкамасининг ваколатли вакилидан мазкур масалани алоҳида назоратга олиб ахборот киритишни сўраганди.
Қурилиш ва уй-жой коммунал хўжалиги вазирлигидан бир ҳафта муддатда мазкур масалани тегишли қонун талаблари асосида узил-кесил ҳал қилишни ва ушбу масалага жавобгар бўлган ваколатли ходимни масъулиятсизлик билан ёндашгани учун расман тушунтириш беришларини биз талаб қиламиз. Бир ҳафта муддатдан кейин шахсан ўзим шуғулланаман, — деганди Танзила Норбоева.
Ҳолат юзасидан “Дарё” мухбири Қурилиш ва уй-жой коммунал хўжалиги вазирлиги масъулларидан изоҳ олди.
Маълум қилинишича, Ногиронлар ассоциацияси раисига электрон калит қайтариб берилган ва ҳолат юзасидан Вазирлар Маҳкамасига ахборот киритилган.
Вазирлик нима сабабдан электрон калит олиб қўйилгани ва ушбу масалага жавобгар бўлган ваколатли ходимга қандай чора кўрилгани бўйича маълумот бермаган.
Изоҳ (0)