“Ҳудудий электр тармоқлари” аҳоли хонадонларида электр ускуналаридан ортиқча фойдаланилганда автоматик тарзда тармоқдан ажратиш амалиёти вақтинча тўхтатилганини маълум қилди.
Хабарга кўра, Вазирлар Маҳкамасининг “Электр энергиясидан фойдаланиш қоидалари” тўғрисидаги 22-сонли қарори тегишли бандига асосан, истеъмолчиларга эҳтиёжлари учун зарур бўлган қурилмаларнинг минимал қувватидан (ҳамда жойлашган ҳудудидан) келиб чиқиб, ҳисоблагич орқали 10-15 кВт қувват доирасида чеклов киритилиш амалиёти жорий этилиши белгиланган.
Шунга асосан, “Ҳудудий электр тармоқлари” АЖ томонидан жорий йил 12 декабрдан электр энергиясини ҳисобга олиш ва автоматлаштириш тизими (ASKUE) орқали киритилган мазкур чора эскирган ва ортиқча юклама билан ишлаётган электр тармоқлари ва трансформатор пунктлари жойлашган маълум бир ҳудудларда истеъмолчиларнинг узоқ вақт электр таъминотидан узилиб қолмаслигини таъминлаш мақсадида фавқулодда ҳолатлар юзага келганда қўлланди.
Республиканинг барча ҳудудларида айни амалиёт қўлланиши натижасида жойларда 100 га яқин трансформатор пунктларида ҳамда электр тармоқларида вужудга келиши мумкин бўлган авариявий ҳодисларнинг олди олинди, натижада истеъмолчиларга электр энергияси тенг тақсимланиши ҳамда кўплаб истеъмолчиларнинг узоқ вақт мобайнида электр таъминотидан узилиб қолмасликлари таъминланди.
Қайд этилишича, бундай чекловлар қиш ва ёз ойларида кузатилган ноқулай об-ҳаво шароитидаги вазиятларда маълум бир вақт оралиғида электр тармоқларида ортиқча юкламалар тушишининг олдини олиш учун ва фақатгина уч фазали ҳисоблагичлар ўрнатилган жисмоний шахсларга нисбатан қўлланади.
Айни кунлардаги истеъмолчиларнинг қайта тармоққа уланмаётганининг асосий сабаби эса бир вақтнинг ўзида 2 ёки ундан ортиқ томонлама электр тармоқларга уланиш натижасида 3 фазали электрон ҳисоблагичларда номутаносибликлар вужудга келаётгани натижасида рўй бермоқда. Бундай ҳолатлар юз берганда истеъмолчи томонидан ортиқча ускуналарни ўчириш (тармоқдан ажратиш), кучланишни белгиланган меъёрдан камайтириш амалиёти бажарилгандан сўнг, ҳисоблагичнинг автоматик равишда ёниши дастурга киритилган, яъни агар хонадонда электр токи ортиқча юклама натижасида ўчган бўлса, юклама камайтирилгандан сўнг электр таъминоти автоматик равишда тикланади.
Солиштириш учун, 15 кВт соат электр энергияси сарфлаш учун бир вақтнинг ўзида бир соат давомида 6 та музлаткич, ўртача 1,5 кВт қувватли 3 та кондиционер ва 3 та электр печи ёниқ туриши керак бўлади. Ноқулай об-ҳаво шароити туфайли аҳоли хонадонларида электр ускуналаридан ортиқча фойдаланилганда автоматик тарзда тармоқдан ажратиш амалиёти вақтинча тўхтатилди.
Изоҳ (0)