Нигина Абдураимова Франциядаги турнирнинг 1/8 финалида иштирок этади

Франциянинг Лимож шаҳарида теннис бўйича W125 тоифасига кирувчи турнир бўлиб ўтмоқда.

Соврин жамғармаси 125 минг долларни ташкил этувчи мазкур мусобақада ўзбекистонлик Нигина Абдураимова ҳам иштирок этмоқда.

Абдураимова илк даврада швейсариялик Сюзан Бандеччини 6:4, 3:1 ҳисобида мағлуб этди. Сюзан иккинчи сетнинг тўртинчи геймидан кейин баҳсни давом эттира олмаслигини маълум қилганди. 

Бугун Нигина мусобақанинг 1/8 финал учрашувида россиялик Анна Блинковага қарши кортга чиқади. Блинкова Лимож турнирининг илк босқичида WTA рейтингида 514-поғонада бораётган украиналик Вероника Подрездан 6/3, 6/1 ҳисобида устун келган. 

Таққослаш учун, Нигина Абдураимова WTA рейтингида 221-поғонадан жой олган. Абдураимова — Блинкова учрашуви бугун Тошкент вақти билан соат 19:00 да бошланади.