Мажбурий ижро бюросининг Самарқанд вилояти бошқармаси ва ИИБ ЖХД йўл ҳаракати хавсизлиги томонидан 18 — 24 ноябрь кунлари ўтказилган қўшма рейдлар давомида маъмурий жарималарни муддатида тўламаган 1955 та қоидабузар ҳайдовчидан 3 миллиард сўмдан ортиқ қарздорлик ундирилган. Бу ҳақда Бош прокуратура матбуот хизмати хабар берди.
Шунингдек, жаримани тўлашдан бош тортганларга тегишли бўлган 443 та автотранспорт воситалари жарима майдонларига жойлаштирилган.
Амалдаги тартибларга кўра, йўл ҳаракати қоидаларини бузганлик учун солинган жаримани ҳайдовчи жарима солиш тўғрисидаги қарор чиқарилган кундан эътиборан 60 кундан кечиктирмай тўлаши лозим. Ана шу муддатда тўланмаган жарималар МИБ иш юритувига ўтказилади ва мажбурий тарзда ундириш чоралари кўрилади.
Аввалроқ Андижон вилоятида 17—20 ноябрь кунлари ўтказилган рейд тадбирида 300 нафар ҳайдовчининг автомашинаси жарима майдонига тортилгани тўғрисида хабар берилганди. Август ойида Тошкент шаҳар ИИББ Йўл ҳаракати хавфсизлиги бошқармаси шахсий таркиби томонидан 1—10 август давомида жами 16 449 та қоидабузарик аниқланган эди.
Изоҳ (0)