“Қанча тез ишга туширсак, нафи шунча катта бўлади” — президент Бухородаги шамол электр станциялари ҳақида

Шавкат Мирзиёев 27 ноябрь куни Саудия Арабистони етакчи АCWА Power компанияси билан амалга оширилаётган йирик энергетика лойиҳаларига старт берганди. Президент ушбу мамлакат компаниялари билан ҳамкорликда жадаллаштириш зарур бўлган масалаларга тўхталди.

Бухорода 3 та шамол электр станцияси бўйича (1,7 миллиард долларлик) шартномалар имзоланган. Турбиналар ўрнатилмоқда.

“Қанча тез ишга туширсак, икки томонга ҳам нафи шунча катта бўлади”, — деди президент ушбу лойиҳа ҳақида.

Қорақалпоғистонда шамол (2,6 миллиард доллар) ва Самарқандда қуёш электр станциялари (1,8 миллиард доллар) ўрганиш ишлари якунланмоқда. Президентнинг таъкидлашича, улар доирасида электр тармоқларни (1 600 километр, 700 миллион доллар) маҳаллий компаниялар томонидан қурилиши мақсадга мувофиқ. Энергетика лойиҳалари бўйича “маҳаллий контент”ни 25 фоизгача етказиш жуда муҳим. Лойиҳалаш, қурилиш ва маҳсулот етказишда ўзбек компаниялари иштирокини кенгайтириш лозим.

Давлат раҳбари янги “Йўл харитаси”га киритилган лойиҳалар бўйича амалий ишларни кечиктирмасдан бошланишига ишонч билдирди. Жумладан:

• “Яшил водород” лойиҳаси (Навоий, Бухоро ва Сирдарёда, 4 миллиард доллар) техник иқтисодий асосини тез ишлаб чиқиб, 2024 йил майгача молиялаштириш масаласини ҳал этиб олиш;
• стратегик аҳамиятга эга янги Тошкент халқаро аэропортини қуриш (1,5 миллиард доллар) лойиҳаси бўйича ҳужжатларни келгуси йил июнгача тайёрлаб, Инвестисия битимини имзолаш.
• Шамол электр станцияси учун минора ишлаб чиқаришни Vision Industries билан (Қорақал-поғистон, 100 миллион доллар) 2024 йил 2-чоракда бошлаш.

Жамжоом Pharma билан АCWА Power молиявий иштирокида “Тошкент фарма парки”да дори воситаларини ишлаб чиқариш бўйича ишларни келгуси йил бошидан йўлга қўйиш.

Ҳозир Саудия тараққиёт жамғармаси билан 150 миллион долларлик 6 та лойиҳа фаол амалга оширилмоқда. Давлат раҳбари янги лойиҳалар портфелини ишлаб чиқиш ва амалга ошириш муҳимлигини таъкидлади. Иқтисодий қўллаб-қувватлаш жамғармаси (100 миллион доллар жалб этилади) фаолиятини йўлга қўйилишини қўллаб-қувватлашини билдирди.

“Умуман олганда, Саудия билан 31 миллиард долларлик келишувларга эришганмиз. Ҳаммасини ўзингиз қатъий назоратга олсангиз, Сиздан жуда миннатдор бўламан”, — деди Шавкат Мирзиёев маросимда қатнашган Саудия Арабистони Подшоҳлиги инвестисиялар вазири Ҳолид ал-Фалиҳга.

Президентнинг қайд этишича, уларнинг ижросини ҳукуматлараро қўшма комиссия йиғилишида (21—22 декабрь) ҳам батафсил муҳокама қилиш зарур.