Шавкат Мирзиёев 27 ноябрь куни Сирдарё вилоятида 1500 мегаватт қувватли замонавий буғ-газ электр станциясини тармоққа улаш маросимида иштирок этганди. Ширин шаҳри ва Боёвут тумани ҳудудида Саудия Арабистонининг АCWА Power компанияси томонидан қурилаётган, жами қуввати 1500 МВт бўлган замонавий иссиқлик электр станциясининг дастлабки босқичи тармоққа уланди.
Ушбу маросимда Шавкат Мирзиёев ва Саудия Арабистони қироллиги инвестиция вазири Ҳолид ал-Фалиҳ иштирок этди. Давлат раҳбари махсус тугмани босгач, замонавий станциянинг илк 500 МВт қувватга эга биринчи блоки ишга тушди.
2023- йил якунига қадар ушбу станциянинг қуввати босқичма-босқич 1000 МВтга, 2024 йилнинг биринчи чорагида тўлиқ 1500 МВт қувватга чиқарилади.
Бу нима беради?
Станция тўлиқ ишга туширилгач йилига 12 миллиард киловатт/соат электр энергияси ишлаб чиқаради. Бу ҳажмдаги электр энергияси Ўзбекистондаги 3 миллиондан ортиқ хонадоннинг бир йиллик истеъмолини қоплаш имконини беради.
Энергетика вазирлигининг маълумотларига қараганда, унда Япония Mitsubishi компаниясининг дунёдаги энг замонавий ва энергия тежамкор газ турбиналари ўрнатилиши ҳисобига йилига 1,1 миллиард кубометр табиий газ тежалади.
Мазкур мегалойиҳа Саудия Арабистонининг АCWА Power компаниясининг тўғридан-тўғри инвестисиялари ҳисобига амалга оширилмоқда.
Изоҳ (0)