Тошкентдаги Humo Arena саройида 25 ноябрь куни машҳур хонанда Jah Khalibънинг концерт дастури куни тартибсизлик юзага келганди. Ушбу тартибсизликлар пайтида фуқаролар жароҳатлангани ва вафот этгани ҳақида тарқалган хабарлар рад этилди.
“Пойтахтимиздаги Humo Arena саройида хонанда Jah Khalib концертига кириш вақтида фуқаролар томонидан содир этилган тирбандликнинг ўз вақтида олди олингани ва унинг сабаблари тўғрисида тўлиқ маълумот берган бўлсак-да, айрим ижтимоий тармоқларда нотўғри хабарларни тарқатишга уринишмоқда. Ижтимоий тармоқ фаолларидан асосланмаган ва текширилмаган маълумотларни тарқатмасликларини сўраб қоламиз”, — дейилади Миллий гвардия Тошкент шаҳри бўйича бошқармаси хабарида.
Тошкент шаҳар ИИББ ҳам бу ҳақда тарқалган хабарлар асосланмаган ва текширилмаган эканини маълум қилди.
“Ўтказилган текширув жараёнида ушбу ҳолатда бирорта фуқаро жароҳат олгани ва вафот этгани ҳақида хабар келиб тушмаган. Ижтимоий тармоқ фаолларидан асосланмаган ва текширилмаган маълумотларни тарқатмасликларини сўраб қоламиз”, — дейилади бошқарма хабарида.
Миллий гвардия Тошкент шаҳри бўйича бошқармаси берган маълумотга кўра, концерт дастури куни жамоат тартибини бузганликда гумонланган фуқаролар воқеа жойидан хавфсиз ҳудудга олиб чиқилиб, юз бериши мумкин бўлган салбий ҳолатларнинг олди олинган.
Ўрганиш давомида аниқланишича, концерт дастури учун чиқарилган 10 мингдан ортиқ электрон чипталар сотиб олинган. Humo Arena саройига кириш учун ташриф буюрган фуқароларнинг чипталари iTicket ходимлари томонидан махсус сканер қурилмасининг QR-коди орқали текширилиб киритилган. Ўриндиқлар тўлган бўлса-да, ташқарида концертга кириш истагида бўлган мингдан ортиқ фуқаро қолиб кетган.
Ушбу фуқароларнинг электрон чипталари кириш жойида такроран тақдим этилаётгани ҳам аниқланган ва бундай чипта эгалари назорат ўтиш жойидан ичкарига қўйилмаган. Улар чипталарни танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.
Ушбу концерт дастурига кириш учун фуқароларга сохта билет сотилганлиги ҳолати юзасидан Тошкент шаҳар ИИББ Тергов бошқармаси томонидан Ўзбекистон Республикаси Жиноят кодексининг 228-моддаси билан жиноят иши қўзғатилган. Тергов ҳаракатлари давом этмоқда.
Изоҳ (0)