Шавкат Мирзиёев Саудия Арабистонининг АCWА Power компанияси билан Чирчиқ шаҳрида яшил водород ишлаб чиқаришга ихтисослаштирилган йирик лойиҳага старт берганди.
Мазкур лойиҳа амалга оширилиши натижасида республикада 2,4 ГВт қувватга эга шамол турбиналари ўрнатилиши, яшил водороддан йилига 500 минг тонна яшил аммиак ишлаб чиқарилиши кўзда тутилмоқда.
Бу нима беради?
Бутун дунёда “яшил” энергетика орқали, яъни яшил водород асосида ишлаб чиқарилган минерал ўғитларни 15-20 фоиз қимматроқ сотиш мумкин. Шу сабабли Ўзбекистонда ҳам яшил, яъни экология учун хавфсиз энергетикадан фойдаланиш маҳсулотлар нархини жаҳон бозорида ҳам қимматлаштиради, ҳам харидорларини кўпайтиради. Бу эса давлат иқтисодиётига катта фойда.
Бугунги кунда Европа давлатларида яшил минерал ўғитларга нисбатан эҳтиёж жуда юқори бўлиб, замон талабларига мос келадиган бу каби маҳсулотни ишлаб чиқариш Ўзбекистон кимё саноати экспорт географиясини янада кенгайтиришга хизмат қилади.
Лойиҳа ишга тушгач, ўғит ишлаб чиқаришда табиий газдан фойдаланиш қисқаради ва ҳар йили қарийб 33 миллион метр куб табиий газ иқтисод қилинади. Лойиҳа доирасида биринчи босқичда йилига 3 минг тонна водород ишлаб чиқариш ва электролизерлар истеъмолини қоплаш учун қуввати 52 МВт бўлган шамол турбиналарини ўрнатиш режалаштирилган.
Мазкур лойиҳа Ўзбекистонда яшил энергетикани ривожлантириш ва иқтисодиётга энергия тежамкор технологияларни кенг жорий қилишда муҳим қадамлардан биридир.
Изоҳ (0)