Кўпчилик Леонардо Ди Каприо фаолиятини афсонавий “Титаник” фильми билан боғлайди. Шубҳасиз, бу шедевр асар, аммо актёр иштирокидаги бошқа машҳур фильмлар ҳам талайгина.
“Уолл-стрит бўриси”
Мазкур кинони кўрмаган бўлсангиз ҳам фильм постерини кўрганингиз аниқ. “Уолл-стрит бўриси” фильмида Ди Каприо Жордан Белфорт ролини ўйнайди. Бу брокер ва акциядорнинг кулгили вазиятларга бой ҳаёти ҳақидаги фильм. Банк ёпилгандан сўнг, фильм қаҳрамони ўз компаниясини очади, натижада жуда тез даромад кўришни бошлайди. Энди унинг пули кўп, ҳар куни базм ва барларга боради, турли аёллар билан ўралашиб қолади. Аммо бирдан ФҚБ Белфортнинг тез муваффақияти ва турмуш тарзи билан қизиқиб қолади. Сюжет воқеалари шу қадар қизиқки мана, ўн йил ўца ҳам мухлислар ушбу фильмни завқ билан томоша қилишади.
“Омон қолган”
“Омон қолган” драмасида актёр ёввойи Ғарбнинг кимсасиз ҳудудида оғир яраланган овчи Хью Гласс ролини ўйнайди. Ўртоғи унга хиёнат қилиб, ёлғиз ўзини ташлаб кетади. Фақат мустаҳкам ирода кучи қаҳрамонга қаҳратон қишда омон қолишга ёрдам беради. Фильм сюжети ва табиат тасвирлари қонингизни бир зумда музлатиб қўяди. “Омон қолган” фильми ниҳоят актёрга биринчи марта орзу қилинган ҳайкалча — “Оскар” мукофотини олиб келади.
“Гулли ой қотиллари”
Шу йилнинг октябрь ойида “Гулли ой қотиллари” тарихий криминал драмаси экранларга чиқди, унда Лео Эрнест Бурхарт ролини ижро этди. Лойиҳа шу қадар оммалашиб кетдики, уни бемалол актёр карьерасидаги энг ёрқин ва эсда қоларли роллар қаторига киритиш мумкин.
Биринчи жаҳон урушидан кейин Францияда ошпазлик қилган қаҳрамон Оклахомадаги амакисининг олдига келади. У йирик ер эгаси ва чорвачилик билан шуғулланади. Амакиси Эрнестни бадавлат оиладан бўлган Молли Кайл билан ишқий муносабатда бўлишга кўндиради. Лекин бу муносабат ушбу оиладан қутулиш ва унинг ерларига эгалик қилиш ҳуқуқини қўлга киритиш учунгина эди. Нима деб ўйлайсиз, қаҳрамон рози бўладими?
“Устаси фаранг”
2002 йилда суратга олинган “Устаси фаранг” комедияси томошабинларни бефарқ қолдирмаган, албатта. Реал воқеаларга асосланган фильмда Лео Франк Абегнейл ролини ўйнайди. Ҳали вояга етмаган қаҳрамон шифокор, адвокат ва ҳатто учувчи бўлиб ишлашга улгуради. У ёлғон ва фирибгарлик, ҳужжатларни қалбакилаштириш ва катта миқдордаги чекларни ноқонуний равишда нақдлаштириш бўйича устаси фаранглардан. Шунга қарамай, ФҚБ агенти Карл Ханратти жиноятчини ушлаш учун қўлидан келган ҳамма ишни қилади.
“Муқаддима”
Леонинг фильмографиясидаги машҳур образларидан яна бири 2010 йилдаги “Муқаддима” фильми бўлиб, унда актёр Дом Кобб ролини ўйнаган. У бошқа одамларнинг онгсизлигидан сир ва ғояларни ўғирлаш қобилиятига эга бўлган устомон ўғри. Сирлар, интригалар, терговлар ҳар доим қизиқарли мавзу, шу сабабдан ҳам мазкур картина ҳеч кимни бефарқ қолдирмайди.
“Озод Жанго”
2012 йилда Ди Каприо “Озод Жанго” жанговар комедия фильмида бош ролни ижро этади. Гарчи асосий воқеалар бошқа қаҳрамонлар иштирокида содир бўлса-да, Лео ижро этган бой, шафқатсиз қулдор ва антагонист Келвин Кенди образи алоҳида эътиборга лойиқдир. Унинг характери, ҳазил туйғуси ва турмуш тарзи бошқалардан ажралиб туради, шу сабабдан ҳам бу образни фильмдаги ёрқин роллардан бири дейиш мумкин.
“Қонли олмос”
2006 йилда суратга олинган “Қонли олмос” саргузашт драмасида Леонардо контрабандачи Дэнни Арчер ролини ўйнайди. У Африканинг Сьерра-Леоне республикасида тартибсизлик ва фуқаролар уруши бўлаётган бир пайтда олмос излайди. Фильмда жуда кўп воқеалар содир бўлади, кутилмаган сюжет бурилишлари ҳеч бир томошабинни бефарқ қолдирмайди.
“Муртадлар”
Мухлисларининг фикрига кўра, Леонардо фильмографиясидаги энг яхши фильм 2006 йилда экранларга чиққан “Муртадлар” фильми ҳисобланади. Картинада Ди Каприо ўтмиши билан мақтанолмайдиган полиция мактаби битирувчиси Билли Костиган ролини ўйнайди. Айнан у бўлим бошлиғи Квинан томонидан маълумот олиш мақсадида ирландиялик гангстерлар гуруҳига кириш учун махсус тайинланган. Фильмга Мартин Скорсезе режиссёрлик қилган, актёр яна у билан ишлашдан мамнун бўлганини алоҳида таъкидлайди.
Изоҳ (0)