Тошкентдаги “Ҳумо арена” саройида 25 ноябрь куни машҳур хонанда Jah Khalib концерт дастури куни тартибсизлик юзага келганди. Миллий гвардия Тошкент шаҳри бўйича бошқармаси ҳолат юзасидан қўшимча маълумот берди.
Ўрганиш давомида аниқланишича, концерт дастури учун чиқарилган 10 мингдан ортиқ электрон чипталар сотиб олинган. “Ҳумо арена” саройига кириш учун ташриф буюрган фуқароларнинг чипталари iTicket ходимлари томонидан махсус сканер қурилмасининг QR коди орқали текширилиб киритилган. Ўриндиқлар тўлган бўлсада, ташқарида концертга кириш истагида бўлган мингдан ортиқ фуқаро қолиб кетган.
Ушбу фуқароларнинг электрон чипталари кириш жойида такроран тақдим этилаётгани ҳам аниқланган ва бундай чипта эгалари назорат ўтиш жойидан ичкарига қўйилмаган. Улар чипталарни танишлари ёки бошқа жисмоний шахслардан совға сифатида ҳамда пул эвазига қўлга киритгани маълум бўлган. Айрим фуқаролар электрон чипталарни ўз манфаати йўлида такроран сотгани аниқланган.
“Ҳозирда ҳолат юзасидан суриштирув ишлари олиб борилмоқда. Бу каби ноқонуний ишга қўл урган шахсларга нисбатан қонуний чоралар кўрилади”, — дейилади хабарда.
Қўшимча қилинишича, бундай ҳолатларни олдини олиш мақсадида Миллий гвардия, ИИВ, Рақамли технологиялар вазирлиги ва ITICKET INGURUZ МЧЖ мутасаддилари томонидан келгусида ҳамкорликда амалга ошириладиган аниқ чора-тадбирлар муҳокама қилинади.
Изоҳ (0)