Қашқадарёда14 ёшли қизни жинсий қулликда сақлаб келишда гумонланаётган аёл қамоққа олинди. Бу ҳақда Болалар омбудсмани хабар берди.
Ҳолат юзасидан Китоб тумани прокуратураси томонидан фуқаро Н.А.га нисбатан Жиноят кодексининг 135-моддаси 3-қисми “а” банди (вояга етмаган шахсга нисбатан одам савдоси) билан жиноят иши қўзғатилган бўлиб, ҳозирда тергов гуруҳи томонидан тергов ҳаракатлари олиб борилмоқда.
25 ноябрь куни фуқаро Н.А. (аёл) гумон қилинувчи тариқасида жалб қилиниб, унга нисбатан Жиноят ишлари бўйича Китоб тумани судининг 26 ноябрдаги ажрими билан қамоққа олиш тарзидаги эҳтиёт чораси қўлланилди.
Хабарда айтилишича, мазкур иш юзасидан болалар омбудсмани вояга етмаган Ч.Т.нинг қонуний манфаатлари таъминланиши устидан парламент назоратини давом эттиради.
Ижтимоий ҳимоя миллий агентлиги берган маълумотга кўра, 14 ёшли қиз отаси қарамоғида бўлган. Онаси 2023 йил январида Россияга ишлаш учун кетиб, бугунги кунгача қайтиб келмаган.
Агентликнинг Китоб тумани “Инсон” ижтимоий хизматлар маркази психолог ва педагогларидан иборат ишчи гуруҳ томонидан вояга етмаган қизнинг жисмоний ва руҳий саломатлигини тиклаш ҳамда мазкур ҳолатнинг келиб чиқиш сабаблари ҳамда уни бартараф этиш чоралари юзасидан “ижтимоий иш” очилган.
Изоҳ (0)