Ижтимоий тармоқда Андижон вилояти Қўрғонтепа туманидаги “Мурувват” ногиронлиги бўлган болалар учун интернат уйининг собиқ директори миллиардлаб сўм маблағни талон-торож қилгани хусусида хабарлар тарқалган эди. Мазкур ҳолат юзасидан Андижон вилояти прокуратураси изоҳ берди.
Тарқалган хабарларда “Мурувват” ногиронлиги бўлган болалар учун интернат уйининг собиқ директори М.М. қурилиш ишлари учун ажратилган 4 миллиард сўмдан ортиқ маблағни талон-торож қилгани айтилган.
Вилоят прокуратурасининг аниқлашича, “Мурувват” ногиронлиги бўлган болалар учун интернат уйида амалга оширилган қурилишлар давомида жами 1 миллиард 74 миллион сўмлик бюджет маблағлари талон-торож қилинган.
“Ҳолат бўйича қурилишни амалга оширган жамиятлар ҳамда интернат уйининг мансабдор шахсларига нисбатан Жиноят кодексининг 167-моддаси 3-қисми “а” (кўп миқдорда фирибгарлик) банди ва бошқа моддалари билан жиноят иши қўзғатилган.
Ҳозирда жиноят иши юзасидан Қўрғонтепа туман прокуратураси томонидан тергов ҳаракатлари олиб борилмоқда”, – дейилади прокуратура ахборотида.
Қўшимча қилинишича, вилоят прокуратураси томонидан жиноят ишининг тергови устидан назорат ўрнатилган.
Изоҳ (0)