Ўзбекистон энегротизими бу йилги қиш мавсумига қай даражада тайёр? Энергетика вазири Жўрабек Мирзамаҳмудов 22 ноябрь куни Олий Мажлис Қонунчилик палатасининг “Ҳукумат соати”да бу саволга жавоб берди.
“Ўтган йили аномал совуқ нималарга тайёрмиз-у, қандай муаммоларимиз борлигини шундай кўрсатиб берди. Бу йилги қиш мавсумига қай даражада тайёрмиз? Қандай тайёргарликлар амалга оширилмоқда?”, — деб сўради депутат Умида Раҳмонова.
Энергетика вазири сўзининг аввалида бу йил ноябрь ойи иссиқ келгани, шунга кўра истеъмол ҳам бир оз пастроқ эканини, ўтган йили ноябрь ойида генерация қувватини ҳисобга олган ҳолда кунлик чеклов киритилганини эслатиб ўтди.
Унинг таъкидлашича, Тошкентдаги муаммолар таҳлил қилинганида табиий газ босими тушиб кетиши, яъни истиш имконияти бўлмаганидан кейин электр-энергия кўп сарфланди. Натижада юкаламани кўтаролмасдан трансформаторлар, симлар ёниб кетди. Подстанцияларда авариялар юзага келди. Шунингдек, иситиш станцияларида газ босими тушиб кетди.
“Нимар қилинди? Бизда энг муаммоли бўлган Юнусобод, Олмазор туманларидаги йирик подстанцияларда алоҳида кабелларни бошқа подстанцияларга тақсимлаган ҳолда шаҳар бўйлаб линиялар тортилиб, юкламани биринчи ўринда пасайтирдик. Иккинчидан, иситиш марказларида газ босими тушиб кетган. Чунки аҳоли тармоққа уланган бўлган. Шунинг учун алоҳида газ қувури саноат тармоғидан тортиб келинди.
Агарда газ босими тушиб кетганда қолган катта станцияларда мазут ёқиш имконияти бўлса, мазут ёқиб иссиқликни ушлаб туриш имконияти бўлмаган. Бу қозонхонани тўлиқ таъмирлаб, мазут ёқишга ихтисослаштирилди. Ҳозирги кунда ўша жойларда 2 минг тоннадан мазут захираси яратилди. Яъни кафолатланган иссиқлик тизими бўлади.
Аномал совуқ келса ёки бирор авариявий ҳолатлар бўлганда биз алгоритм ишлаб чиққанмиз. Зарур бўлса қайси йирик истеъмолчиларни тўхтатиб туришгача алгоритм ишлаб чиқилган. Мазут захираси қилинди, кафолатланган табиий газ захираси яратилди", — дейди вазир.
Изоҳ (0)