Статистика агентлиги Ўзбекистоннинг 2023 йил январь—октябрь ойларидаги ташқи савдо айланмасига доир маълумотни эълон қилди.
Қайд этилишича, ўтган ўн ой ичида республиканинг ташқи савдо айланмаси 51 миллиард долларга етган ва бу 2022 йилнинг мос даврига нисбатан 10,3 миллиард долларга ёки 25,2 фоизга кўпайган.
Ташқи савдо айланмасида экспорт ҳажми 20,47 миллиард долларни, импорт ҳажми эса 30,5 миллиард долларни ташкил этган. Ўтган йилнинг мос даври билан таққослаганда экспорт ҳажми 29,1 фоизга, импорт ҳажми 22,7 фоизга ошган.
Ўзбекистон жаҳоннинг 198 мамлакати билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссаси Хитой (21,2 фоиз), Россияда (15,6 фоиз), Қозоғистонда (7 фоиз), Туркияда (5,1 фоиз) ва Жанубий Кореяга (3,7 фоиз) тўғри келган.
Аввалроқ Европа тикланиш ва тараққиёт банки Ўзбекистон иқтисодиёти 2023 ва 2024 йилларда 6,5 фоизга ўсишини прогноз қилганди. Банк ўзининг минтақавий ҳисоботида ташқи боғлиқликнинг нисбатан кучсизланишига қарамай, Ўзбекистон иқтисодиётига Россиянинг Украинага қарши урушининг янада кучайиши ва пул ўтказмаларининг қисқариши қийинчилик туғдириши мумкинлиги қайд этилган.
Жаҳон банки ҳисоб-китобларига кўра эса Ўзбекистон ялпи ички маҳсулотининг ўсиши 2023 йилда 5,5 фоизга яқинлашади.
Изоҳ (0)