Қозоғистон адлия вазири Азамат Ескараев мамлакат собиқ президенти Нурсултон Назарбоевда қандай имтиёзлар сақланиб қолинганини айтди. Бу ҳақда Нур.кз хабар берди.
Вазирдан Назарбоевни барча қонунлардан “чиқариб ташлаш” жараёни тугалланган деб ҳисоблаш мумкинми ва собиқ президент қандай имтиёзларга эга экани сўралган.
“Мен ҳеч қандай сабаб кўрмаяпман. Январь ойида қабул қилинган қонундан келиб чиққан ҳолда, бу одатий қонунчилик жараёни бўлиб, айрим позицияларда бу давом этди.
Имтиёзларга келсак, президент тўғрисидаги конституциявий қонунимизда собиқ президентга тегишли кафолатлар берилган. Унда уй-жой ва транспорт билан таъминлаш учун кафолатлар мавжуд. Бу қонунда аниқ қайд этилган”, — деб жавоб берди вазир.
Январь ойида парламент “ ‘Қозоғистон республикасининг биринчи президенти тўғрисида’ги конституциявий қонунни ўз кучини йўқотган деб топиш тўғрисида”ги қонунни қабул қилди. Ҳужжат Назарбоевни қатор имтиёзлардан, жумладан, Элбоши мақомидан маҳрум қилди. Кейинчалик у Назарбоев университети, Назарбоев интеллектуал мактаблари ва Назарбоев жамғармаси каби ўз шарафига номланган таълим ташкилотларининг олий васийлик кенгаши раҳбари мақомини йўқотди.
Назарбоев ҳали ҳам қандай имтиёзларга эга?
Қозоғистон Конституцияси мамлакатнинг собиқ президентларига пенсия, квартира, давлат дачаси, шахсий автомобиль, мамлакат бўйлаб бепул саёҳат қилиш, тиббий ёрдам ва санаторий-курортда даволанишни кафолатлайди. Асосий қонунда “собиқ президент президент сифатидаги ваколатларини амалга ошириш билан боғлиқ ҳаракатлар учун жавобгарликка тортилиши мумкин эмас, давлатга хиёнат қилиш ҳоллари бундан мустасно”, дейилади.
Изоҳ (0)