Алия Назарбоева ва Болат Назарбоевнинг Олмаота яқинидаги ерлари давлат мулкига қайтарилди. Бу ҳақда Олмаота вилояти прокуратурасига таяниб, Tengrinews хабар берди.
13 апрель куни вилоят прокурори Берик Адамов раислигида ер қонунчилигига риоя этиш масалаларига бағишланган йиғилиш бўлиб ўтди. Унда ердан оқилона фойдаланиш, ноқонуний йўллар билан олинган ерларни қайтариш масалалари муҳокама қилинди.
Вилоят назорат органида икки минг гектардан ортиқ ерни суд қарори билан давлатга қайтаришга эришилгани маълум қилинди. Ер участкалари Олмаота вилоятининг Жамбил ва Қорасой туманларида жойлашган. Илгари улар Алия ва Болат Назарбоевларга тегишли бўлган.
“Жамбил вилояти ҳокимлигининг 2012 йил 21 декабрь ва 2013 йил 15 апрелдаги қарори билан Назарбоева А.Н.га қарашли ‘Жандану’ фермер хўжалигига ижарага ер участкалари берилди. Шу билан бирга, кадастр файлида иккала қарор учун ижара шартномалари мавжуд бўлмаган.
Туман ҳокимлигининг жавобига кўра, Назарбоева А.Н. номидаги ‘Жандану’ фермер хўжалиги билан ушбу ерлар учун ижара шартномалари тузилмаган. Кейинчалик ер тўртта алоҳида участкага бўлинган. Бундан ташқари, Олмаота вилояти туман ҳокимлигининг 2014 йил 13 январдаги қарори билан ушбу ер участкалари ‘Жандану’га хусусий мулк ҳуқуқи асосида берилган”, — дейилади хабарда.
Кейин ер участкалари бирлаштирилиб, уларга биттадан давлат далолатномаси расмийлаштирилиб, кадастр рақами берилган. Умумий майдони 445 гектар бўлиб, деҳқончилик мақсади кўзлангани келтирилган. Прокуратура ер қонунчилиги бузилишига йўл қўйилган деб ҳисобламоқда.
Болат Назарбоевнинг ерларига келсак, 2016 йил 13 июлда Қорасой тумани ҳокимлиги қарори билан Аisam аnd Cо.Ltd масъулияти чекланган жамиятига (ҳозирги асосчиси Назарбоевнинг укаси) 1485 гектар ер участкаси ижарага берилган. Вилоят прокурори ер участкаси ширкатга ер қонунчилиги талаблари бузилган ҳолда берилган, деб ҳисоблаган.
Изоҳ (0)