Олий Мажлис Қонунчилик палатаси депутати Олтиной Мамирова 2024 йил учун таклиф этилган бюджетнома муҳокамасида энергетик ичимликлар учун алоҳида акциз солиғи солишни таклиф қилди.
Мажлис аввалида бош вазир ўринбосари — иқтисодиёт ва молия вазири Жамшид Қўчқоров 2024 йил 1 апрелдан таркибида шакар мавжуд бўлган газланган ичимликларнинг 1 литри учун 500 сўм миқдорида акциз солиғи солиш таклифини берган эди.
Депутат Олтиной Мамирова таклиф этилаётган акциз солиғи кутилган натижа бермаслигини таъкидлаб ўтди.
“Жаҳон соғлиқни сақлаш ташкилотининг тавсиясига кўра, бир кунлик шаҳар истеъмол ҳажми 12 ош қошиқдан ошмаслиги керак. Газланган ширин, жумладан, энергетик ичимликларнинг 330 миллиграмм ҳажмидаги таркибида 19 ош қошиқ шакар мавжуд. Бугунги кунда аҳоли, айниқса, ёшлар ўртасида энергетик ичимликларга ружу қўйиш ортиб бормоқда.
Қонун лойиҳасига биноан бюджетномада 2024 йил 1 апрелдан бошлаб таркибида шакар бўлган 1 литр газланган ичимлик учун 500 сўм акциз солиғи жорий этилмоқда. Ваҳоланки, бозордаги 200 миллиграмм ҳажмдаги энергетик ичимлигининг нархи 15 минг сўм. Қонун кучга кириши билан бу ичимликка 100 сўм атрофида қўшимча нарх қўйилади. Бу эса энергетик ичимликлар истеъмолини камайтиришга матив бўлмаслиги мумкин.
Шунинг учун “Адолат” социал-демократик партияси фракциясини энергетик ичимликлар учун алоҳида акциз солиғи жорий қилиш, яъни 1 литр энергетик ичимликлар учун 5 минг сўм акциз солиғи белгилашни таклиф қилади”, — деди депутат.
Бош вазир ўринбосари Жамшид Қўчқоров депутат таклифини қувватлаб, энергетик ичимликларга ружу қўйиш хавотирли ҳолат эканлигини таъкидлаб ўтди.
“Охирги маротаба вилоятга борганимда бир қишлоқдаги дўконга асосий озиқ-овқат маҳсулотларини нарҳини билиш учун кирдим. Дўкон мактабнинг рўпарасида жойлашган экан. Растада энергетик ичимликлар сотувда турганига кўзим тушиб, дўкончидан бу ичимликлар сотуви қандай, деб сўрасам, у кунига 5-6 дона сотишини айтди.
Айрим идоралардаги ходимларни ҳам энергетик сувлар ичганини кўрганман. Гўёки шу билан калласи яхши ишлаб кетармиш. Уйқуси қочиб, ишчанлик қобилияти ортиб кетаркан. Шундан келиб чиқиб айтиш мумкинки, депутатимиз айтган фикрни оддий таклиф эмас, хавотирли ҳолат деб айтган бўлардим.
Тўғриси, биз лойиҳа ишлаб чиқишда бу жиҳатларни чуқур ўйламаганмиз ёки ҳамкасбларимиз кейинги босқичда қиламиз, деган бўлиши мумкин. Агар шу таклифни депутатларимиз маъқуллаб берса, яхши бўлар эди”, — деди Жамшид Қўчқоров.
Аввалроқ бош вазир ўринбосари нима учун таркибида шакар бўлган газли ичимликларнинг бир литрига 500 сўм акциз солиғи солинаётганига изоҳ берган эди.
Изоҳ (0)