Исроил Ғазо секторининг шимолидан жанубигача иккита гуманитар йўлак очишга, шунингдек, ҳарбий амалиётларда ҳар куни тўрт соатлик танаффус қилишга рози бўлди. Бу ҳақда АҚШ Миллий хавфсизлик кенгаши вакили Жон Кирбига таяниб, CBS News хабар берди.
Кирбининг қайд этишича, битта гуманитар йўлак аллақачон очилган, иккинчиси қирғоқ йўлида бўлади. Гуманитар танаффуслар 9 ноябрдан бошланади.
“Буни муҳим қадам деб ҳисоблаймиз. Ва биз унинг қанча керак бўлса, шунча давом этишини истаймиз”, — дейди Кирби.
Шунингдек, у бир кун аввал Ғазо секторига 126 та юк машинасида гуманитар ёрдам етказилганини, бироқ уларнинг сонини кунига 150 тага етказиш кераклигини айтган.
Аввалроқ АҚШ президенти Жо Байден Исроил-Фаластин можароси давомида Ғазо секторида ўт очишни тўхтатиш имконияти йўқлигини айтганди. Байден Исроил бош вазири Биньямин Нетаньяху билан 6 ноябрь куни ўтказган мулоқотида ҲАМАС томонидан қўлга олинган асирларни озод этиш учун уни Ғазода ўт очишни уч кунга тўхтатиб туришга чақирганди. Нетанхаю Байденга бундай вариантга қарши эканини, чунки ҲАМАСга ишонмаслигини ва улар битимнинг ўзига тегишли қисмини бажармаслигини билдирган.
Изоҳ (0)