Қашқадарё вилоятининг Косон туманида фаолият юритувчи инглиз тили ҳамда информатика фани ўқитувчилари 1000 доллардан ҳам кўп маош олмоқда. Бу ҳақда “Дарё” мухбири хабар берди.
Маълум бўлишича, ҳар икки ўқитувчи ҳам бир мактабда фаолият юритади.
Айни кунда 16 миллион сўм маош олаётган Наргиза Норқулованинг меҳнат фаолиятига 10 йил тўлди. У Косон туманидаги 9-сонли ихтисослаштирилган давлат умумтаълим мактабида инглиз тили фанидан дарс бериб келади.
Иш фаолиятимнинг бешинчи йилида олий тоифали ўқитувчи мақомига эришдим. Шунингдек, миллий ва халқаро сертификатлардан аъло даражада ўтиб, C1 даражаси соҳибаси бўлдим. Юздан ортиқ ўқувчиларим B2, C1 даражаларини қўлга киритиб, олий таълим муассасаларида грант асосида ўқиб келишмоқда. Бундан ташқари, 10 дан ортиқ ўқувчиларим хорижнинг нуфузли давлатларидаги топ университетларда ўқийди, — дейди у.
Ўқитувчининг айтишича, 2023 йилгача унинг ойлик маоши 11 миллион сўмни ташкил қилган.
Ҳозирги кунда вазир жамғармаси учун белгиланган имтиҳонлардан муваффақиятли ўтганим учун ойлик маошимга яна 5 миллион сўм қўшилди. Натижада айни кунда 16 миллион сўм маош олиб келяпман, — дейди ўқитувчи.
Косон туманидаги 9-сонли ихтисослаштирилган давлат умумтаълим мактабининг информатика ва ахборот технологиялари фани ўқитувчиси Улуғбек Маматқулов ҳам 1000 доллардан кўп маош олади.
25 йиллик иш тажрибага эга ўқитувчи айни кунда 14 миллион сўм маош олишини айтмоқда.
25 йиллик ўқитувчи бўлсам, сўнгги 6-7 йиллик иш фаолиятимиздаги таълимга эътибор, бизнинг 14 миллион сўмдан маош олишимизга имконият яратмоқда. Сир эмаски, бундан олдин ўқитувчилар пахта даласида кўкарарди. Бугун ҳеч қандай муболағасиз мен ўқитувчилигимдан чин маънода фахрланяпман. Ҳозир тўй-маъракаларда кўриб қолишса ҳам устоз, устоз, деб ҳурмат кўрсатишмоқда, — дейди Улуғбек Маматқулов.
Наргиза Норқулова ҳамда Улуғбек Маматқуловлар президент Шавкат Мирзиёевнинг ўқитувчилар маошини 1000 долларга етказиш ҳақидаги ташаббусини эшитгач, аввалига ишонқирамаганини, аммо шундай имконият берилса, шу маошни олувчи биринчи ўқитувчи мен бўламан, дея ният қилганини айтмоқда.
Ўқитувчилар маоши 1000 долларга етказилса, ўша маошни олувчи биринчи ўқитувчи ўзим бўламан, дея ҳаракатга тушдим, — дейди ҳар икки ўқитувчи бу ҳақда гапирар экан.
Президент Шавкат Мирзиёев раислигида 28 август куни бўлиб ўтган мактабларда таълим сифатини янада ошириш, ўқувчи ўрнини кўпайтириш ҳамда ўқитувчилар малакасини ошириш ва уларга муносиб шароит яратиш бўйича устувор вазифаларга бағишланган видеоселектор йиғилишида Ўзбекистонда юқори маош олувчи ўқитувчилар сони очиқланганди. Таъкидланишича, мамлакатда 6 миллион сўмдан 10 миллион сўмгача маош оладиган ўқитувчилар сони — 23 минг нафарга етган. 10 миллион сўмдан юқори ойлик олувчилар эса мингдан ошган. Яна икки мингга яқин муаллимларга Вазир жамғармасидан қўшимча устамалар тўланмоқда.
Изоҳ (0)