Сурхондарё вилояти ҳокимлиги М39 халқаро автомагистрал йўлида сел-сув тошқин оқибатлари бартараф этилаётганини маълум қилди.
Қайд этилишича, 8 ноябрь кунининг иккинчи яримида М39 халқаро автомагистрал йўлининг Бойсун тумани “Чилонзор” маҳалласидан ўтган қисмида сел-сув тошқинлари йўлнинг қатнов қисмига чиқиб келган.
Ҳодиса жойига туман ҳокимлиги, ички ишлар, фавқулодда вазиятлар, йўл ҳаракати хавфсизлиги бўлинмалари ходимлари етиб борган ва вазият назоратга олинган.
“Ҳозирда сел-сув тошқини оқибатларини бартараф этиш, йўлдаги лой-шағал аралашмасини тозалаш ишлари олиб борилмоқда. Транспорт ҳаракати тикланган. Шунингдек, Фавқулодда вазиятлар ходимлари томонидан йўл бўйида жойлашган айрим хонадонлар ва бошқа объектларда сув тўпламларини тозалаш ишлари давом эттирилмоқда”, — дейилади хабарда.
Аввалроқ “Ўзгидромет” 8—9 ноябрь кунлари кучли ёмғирлар натижасида сел-сув тошқинлари юзага келиши мумкинлиги тўғрисида хабар берганди. Тоғолди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан зарур эҳтиёт чораларини кўришларини, сел-сув тошқинлари юзага келганда тезкор штабларнинг 101, 1050 телефон рақамларига мурожаат қилиш сўралади.
Изоҳ (0)