Surxondaryo viloyati hokimligi M39 xalqaro avtomagistral yo‘lida sel-suv toshqin oqibatlari bartaraf etilayotganini ma’lum qildi.
Qayd etilishicha, 8-noyabr kunining ikkinchi yarimida M39 xalqaro avtomagistral yo‘lining Boysun tumani “Chilonzor” mahallasidan o‘tgan qismida sel-suv toshqinlari yo‘lning qatnov qismiga chiqib kelgan.
Hodisa joyiga tuman hokimligi, ichki ishlar, favqulodda vaziyatlar, yo‘l harakati xavfsizligi bo‘linmalari xodimlari yetib borgan va vaziyat nazoratga olingan.
“Hozirda sel-suv toshqini oqibatlarini bartaraf etish, yo‘ldagi loy-shag‘al aralashmasini tozalash ishlari olib borilmoqda. Transport harakati tiklangan. Shuningdek, Favqulodda vaziyatlar xodimlari tomonidan yo‘l bo‘yida joylashgan ayrim xonadonlar va boshqa obyektlarda suv to‘plamlarini tozalash ishlari davom ettirilmoqda”, — deyiladi xabarda.
Avvalroq “O‘zgidromet” 8—9-noyabr kunlari kuchli yomg‘irlar natijasida sel-suv toshqinlari yuzaga kelishi mumkinligi to‘g‘risida xabar bergandi. Tog‘oldi va tog‘li hududlarda istiqomat qiluvchi fuqarolar, dam oluvchilar hamda tog‘li hududlarda harakatlanuvchi haydovchilardan zarur ehtiyot choralarini ko‘rishlarini, sel-suv toshqinlari yuzaga kelganda tezkor shtablarning 101, 1050 telefon raqamlariga murojaat qilish so‘raladi.
Izoh (0)