Сурхондарёда 40 га яқин хонадонни сел босиб, 230 дан ортиқ киши эвакуация қилинди

Сурхондарё вилоятининг Узун туманида юзага келган сел оқимлари оқибатлари бартараф этилмоқда, деб хабар беради ФВВ матбуот хизмати.

5 май куни соат 23:00 да Сурхондарё вилояти Узун туманида тоғ ва адирликларида кузатилган кучли ёғингарчилик оқибатида «Мустақилликнинг 22 йиллиги» МФЙ «Тоштепа» қишлоғи ҳудудидан оқиб ўтувчи «Ўрта ариқ» каналида сув миқдори меъёридан ошиб кетиши натижада каналдан тошиб, унга яқин жойлашган 40 га яқин аҳоли уйлари, томорқалари ва «Деҳқон» маҳалласида 15 та аҳоли томорқаларига кирган.

Аҳоли хавфсизлигини таъминлаш мақсадида «Тоштепа» қишлоғидаги 40 та хонадонлардан 230 дан ортиқ фуқаро вилоят ФВБ раҳбарияти бошчилигида қутқарувчилар, Ички ишлар, Миллий гвардия ҳамда вилоят ҳокимлиги масъул ходимлари билан ҳамкорликда туманда жойлашган 19-сонли умумтаълим мактабига вақтинчалик кўчириб ўтказилган.

Ҳодиса оқибатида аҳолини тан жароҳат олиши ҳолатлари тўғрисида маълумот келиб тушмаган. Вазият тўлиқ Фавқулодда вазиятлар вазирлиги назоратида.

«Воқеа жойида хонадонма-хонадон юриб, ҳолатнинг кўлами ва талофатларни аниқлаш, махсус техникалар ёрдамида ҳодиса оқибатларини бартараф этиш ишлари олиб борилмоқда», — дейилади хабарда.

Узун тумани ҳокимлигининг маълум қилишича, сел сувлари қишлоқларининг ички йўлларига тошган ҳамда айрим аҳоли хонадонларининг ховли ва таморқаларига зарар етказган. Ҳозирда сел оқимидан сўнг йўлларда йиғилиб қолган қум-шағал ва лойқаларни тозалаш ишлари махсус муҳандислик техникалари ёрдамида амалга оширилмоқда. Ушбу тозалаш ишлари туман ҳокимияти томонидан назоратга олинган.

3 май куни Сурхондарё вилоятининг Сариосиё тумани Сангардак ва Хурсандсой сойида ҳам сел кузатилгани тўғрисида хабар берилганди.

Эслатиб ўтамиз, «Ўзгидромет» 3—4 майда Волгабўйи ҳудудларидан нам ва нисбатан салқин ҳаво массалари кириб келишини маълум қилганди. Кучли ёғингарчилик сабаб Ўзбекистоннинг айрим ҳудудларида сел оқимлари ва тошқин сувлари юзага келди. Марказ 5 майда ҳам тоғолди ва тоғли ҳудудларда, хусусан, Сурхондарё вилоятининг 9 та туманида сел-сув тошқин ҳодисалари юзага келиши хавфи мавжуд эканини айтиб ўтганди.