Андижон вилоятининг Қўрғонтепа туманидаги мурувват уйида ҳимояга муҳтож болаларга ходим куч ишлатгани акс этган видео тарқалди. Ҳолат юзасидан Ижтимоий ҳимоя миллий агентлиги муносабати эълон қилинди.
Аниқланишича, ушбу ҳолат 2023 йилнинг 24 июлида соат 12:05 ларда, Қўрғонтепа “Мурувват” ногиронлиги бўлган болалар учун интернат уйининг 6-гуруҳида содир бўлган. Ҳозирда ҳолатга қонуний баҳо бериш бўйича Агентликнинг Андижон вилояти бошқармаси томонидан ишчи гуруҳ тузилиб, Қўрғонтепа тумани прокуратураси билан ҳамкорликда суриштирув олиб борилмоқда.
“Ушбу ҳолат бўйича керакли чоралар кўрилмоқда. Ўрганиш натижалари бўйича қўшимча маълумот тақдим этилади”, — дейилади хабарда.
Аввалроқ Тошкент вилоятининг Чиноз туманида жойлашган Республика қизлар ўқув-тарбия муассасасида комплекс ўрганиш ишлари олиб борилаётгани маълум қилинганди.
Изоҳ (0)