Turkmaniston prezidenti Serdar Berdimuhamedov Iqtisodiy hamkorlik tashkilotining XVI sammitida ishtirok etish uchun 8—9-noyabr kunlari Toshkentga kelishni rejalashtirmoqda, deb xabar berdi “Oltin Asr” mahalliy turkman telekanali.
“Hukumat yig‘ilishida Turkmaniston delegatsiyasining O‘zbekistonga amaliy tashrifiga tayyorgarligi muhokama qilindi. Berdimuhamedov xalqaro tashkilotlar doirasidagi o‘zaro manfaatli hamkorlikni mustahkamlash va rivojlantirish mamlakat tashqi siyosati strategiyasining ustuvor yo‘nalishi ekanini taʼkidladi”, — deyiladi xabarda.
Ushbu tashkilotning avvalgi sammiti 2021-yil 28-noyabr kuni Turkmaniston poytaxtida bo‘lib o‘tgandi. Yakunda mintaqada energiya xavfsizligini oshirish muhimligi haqida gapirilgan Ashxobod konsensusi qabul qilingan.
Ushbu hujjat, umuman olganda, Iqtisodiy hamkorlik tashkiloti davlatlarining savdo-iqtisodiy, sarmoyaviy, transport-logistika va energetika sohalarida hamkorligini kengaytirishga qaratilgan.
Ashxoboddagi sammitda tashkilotga aʼzo 10 ta davlatdan 7 tasi dengizga chiqish imkoniga ega bo‘lmagani uchun yagona transport kengashini tuzish tashabbusi ham bildirilgandi.
Yakuniy deklaratsiyada Afg‘onistonda siyosiy inklyuziya muhimligi, asosiy inson huquqlari, jumladan, ayollar himoyasi, terrorizmga qarshi kurashda samarali choralar ko‘rilishi ta’kidlangan.
Eziz Boyarov
Izoh (0)