Қорақалпоғистон Республикаси, Тошкент ва Фарғона вилоятлари ҳамда Тошкент шаҳрида валюта қимматликларини ноқонуний муомалага киритилишининг олди олинди, деб хабар беради Бош прокуратура ҳузуридаги департамент.
Қайд этилишича, департаментнинг Миробод туман бўлими томонидан ИИББ ходимлари билан ҳамкорликда тезкор тадбир ўтказилган. Тадбирда валюта айирбошлаш билан шуғулланиб келган Ш.Й. жами 3,5 минг долларни фуқаро М.А.га 42,9 миллион сўмга сотган вақтида ашёвий далиллар билан ушланган.
Худди шундай, департаментнинг Қувасой шаҳар бўлими томонидан ўтказилган тезкор тадбирда валюта айирбошлаш билан шуғулланиб келган А.Х. жами 3,2 минг долларни фуқаро Ш.К.га 39,3 миллион сўмга сотган вақтида ашёвий далиллар билан қўлга олинган.
Ангрен шаҳри ҳудудида ўтказилган тезкор тадбирда эса валюта айирбошлаш билан шуғулланиб келган М.А. (муқаддам судланган) жами 3 минг долларни фуқаро Э.М.га 36,8 миллион сўмга сотган вақтида ашёвий далиллар билан ушланган.
Департаментнинг Тўрткўл туман бўлими томонидан ИИБ ходимлари билан ҳамкорликда ўтказилган тезкор тадбирда бўлса валюта айирбошлаш билан шуғулланиб келган Н.А. жами 269 минг Россия рублини фуқаро Н.М.дан 34,1 миллион сўмга сотиб олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Ноқонуний валюта айирбошлаш учун қандай жавобгарлик белгиланган?
“Иқтисодий жиноятлар ва оммавий қирғин қуролини тарқатишни молиялаштиришга қарши курашиш механизмлари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунга асосан фуқароларнинг қонунга хилоф равишда валюта қимматликларини олиши ёки ўтказиши шундай ҳаракатлар учун маъмурий жазо қўлланилганидан кейин содир этилган бўлса, энг кам ойлик иш ҳақининг 75 бараваридан 100 бараваригача миқдорда жарима ёки икки йилдан уч йилгача ахлоқ тузатиш ишлари ёхуд бир йилгача озодликни чеклаш ёки бир йилгача озодликдан маҳрум қилиш билан жазоланади.
Ўша ҳаракатлар анча миқдорда содир этилган бўлса, энг кам ойлик иш ҳақининг 100 бараваридан 300 бараваригача миқдорда жарима ёки бир йилдан уч йилгача озодликни чеклаш ёки бир йилдан уч йилгача озодликдан маҳрум қилиш билан жазоланади.
Шунингдек, валюта айирбошлаш такроран ёки хавфли рецидивист томонидан, кўп миқдорда, бир гуруҳ шахслар томонидан олдиндан тил бириктириб содир этилганда энг кам ойлик иш ҳақининг 300 бараваридан 500 бараваригача миқдорда жарима ёки уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.
Мазкур ҳаракат жуда кўп миқдорда, уюшган гуруҳ томонидан ёки унинг манфаатларини кўзлаб содир этиладиган бўлса, беш йилдан етти йилгача озодликдан маҳрум қилиш билан жазоланиши белгиланди.
Тайёргарлик кўрилаётган ёки содир этилаётган жиноят ҳақида ўз ихтиёри билан арз қилган ва уни очишга фаол ёрдам берган шахс жавобгарликка тортилмайди.
Изоҳ (0)