“Қора бозор”да валюта айирбошлашга қонуний рухсат бериладими? Марказий банк раиси жавоб берди

Кеча, 26 октябрь куни Марказий банк раҳбарияти ва журналистлар иштирокида жорий макроиқтисодий вазият ва келгусида кутилаётган иқтисодий кўрсаткичларга доир матбуот анжумани бўлиб ўтди. Мулоқотда журналист Аброр Зоҳидов Марказий банк раиси Мамаризо Нурмуродовга банкларда валюта айирбошлаш жараёнида узун навбатлар кузатилиши, бунга ечим сифатида нобанк ташкилотларга ёки жисмоний шахсларга ҳам валюта айирбошлаш шохобчалари очишга рухсат берилиши мумкинми, деган мазмундаги савол билан мурожаат қилди.

Мамаризо Нурмуродовнинг айтишича, нобанк ташкилотларга валюта айирбошлашга рухсат бериш режада йўқ.

“Бу борада Марказий банк ўзининг қатъий позициясига эга. Юридик ва жисмоний шахсларга, яъни нобанк ташкилотларга валюта айирбошлаш шохобчалари очишга рухсат бериш ниятимиз йўқ. Банкларнинг қошидаги валюта айирбошлаш шохобчаларини ҳар қайси банк ўзининг эҳтиёжидан келиб чиқиб, ривожлантираверади. Марказий банкда уларга қўшимча валюта айирбошлаш шохобчаси очиш ёки бундай шохобчаларни кўпайтириш талабларини қўйиш ваколати йўқ”, —деди ташкилот раҳбари.

Эслатиб ўтамиз, президент Шавкат Мирзиёевнинг “Валюта сиёсатини либераллаштириш бўйича биринчи навбатдаги чора-тадбирлар тўғрисида”ги фармони билан 2017 йил 5 сентябрдан Ўзбекистон банкларида аҳоли ва тадбиркорлар учун чет эл валютаси эркин ва чекланмаган миқдорда сотила бошланган.