Ўзбекистонда аҳолини рўйхатга олиш 2023 йилнинг 1–25 ноябрида ўтказилиши белгиланганди. Статистика агентлиги айни пайтда ушбу тадбирни ўтказиш билан боғлиқ молиявий масалалар кўриб чиқилаётганини маълум қилди.
Президентнинг 2019 йил 5 февралдаги фармонига мувофиқ, республикада аҳолини рўйхатга олиш тадбирини 2022 йилда ўтказиш белгиланган эди. 2020 йил 16 мартда “Аҳолини рўйхатга олиш тўғрисида”ги қонун қабул қилинди. 2020 йилда бошланган коронавирус пандемияси сабабли ушбу тадбирни ўтказиш 2023 йилга кўчирилганди.
Агентлик хабарида қайд этилишича, аҳолини рўйхатга олишга пухта тайёргарлик кўриш мақсадида соҳани тартибга солувчи барча норматив-ҳуқуқий ва услубий ҳужжатлар ҳамда рўйхатга олиш саволномалари шакллари ишлаб чиқилди, аҳолини рўйхатга олишнинг махсус веб-сайти — aholi.stat.uz жорий қилинди, тадбирнинг логотипи ва шиори (“Янги Ўзбекистоннинг бир қисми бўл!”) тайёрланди, аҳолини рўйхатга олишнинг бирламчи маълумотларини йиғиш, қайта ишлаш, таҳлил қилиш ва натижаларини шакллантириш имконини берувчи “Аҳолини рўйхатга олиш” ахборот тизими ишлаб чиқилди. Шунингдек, республикамиздаги барча маҳаллаларнинг схематик хариталари янгиланиб, аҳоли яшайдиган турар ва нотурар жойлар рўйхати тузиб чиқилди.
2021 йил 1—25 ноябрь кунлари Андижон вилоятининг Хўжаобод тумани, Тошкент вилоятининг Юқори Чирчиқ тумани, Хоразм вилоятининг Хива шаҳри ҳамда Тошкент шаҳрининг Яшнобод туманида синов тариқасида аҳолини рўйхатга олиш тадбири ўтказилди. Рўйхатга олиш жараёнлари уч хил усулда ўтказилиб, интернет тармоғи орқали, планшет ва қоғоз усулларида рўйхатга олиш жараёнлари синовдан ўтказилди.
Синов жараёнларида планшет усулида аҳолини рўйхатга олиш қоғоз усулига нисбатан қулайлиги, тезкорлиги ва иқтисодий жиҳатдан самаралироқ эканини кўрсатди. Синов натижалари ва илғор давлатлар тажрибалари асосида рўйхатга олиш жараёнларини қоғоз усулидан воз кечиб, интернет тармоғи орқали ва планшет қурилмаларидан кенг фойдаланган ҳолда ўтказиш режалаштирилмоқда.
“Шу билан бирга, ушбу тадбирни ўтказиш билан боғлиқ молиявий харажатлар ўрганиб чиқилаётганлигини инобатга олиб, якуний қарор қабул қилингандан сўнг агентлик томонидан қўшимча ахборот берилишини маълум қиламиз”, — дейилади хабарда.
Шавкат Мирзиёев 2020 йилнинг июнида миллий статистика соҳасини такомиллаштириш чора-тадбирлари бўйича ўтказган йиғилишда Ўзбекистонда мустақиллик йилларида мамлакатда аҳолини рўйхатга олиш ўтказилмаганини таъкидланганди.
Изоҳ (0)