Андижон вилоятида Суриядаги террорчилар сафига бориб қўшилган ўзбекистонлик эркак қидирувга берилди. Бу ҳақда вилоят ИИБ ахборот хизмати маълум қилди.
Қайд этилишича, 2019 йил августда фуқаро Ҳ.М. ишлаш мақсадида Россияга борган. У ерда қурилиш ишлари билан шуғулланиб юрган вақтида халқаро террорчилик ташкилоти раҳнамоларининг таъсирига тушиб қолган. Шундан сўнг, ўша йилнинг ноябрида Туркия орқали Сурияга ўтган.
Олиб борилган суриштирув ишлари натижасида Ҳ.М. ҳозирда Суриянинг Идлиб шаҳрида халқаро террорчилик ташкилотининг “Тавҳид ва жиҳод” жамоатига қўшилиб, жанговар ҳаракатларда қатнашмоқда.
Фуқаро Ҳ.М.га нисбатан Жиноят кодексининг 159-(Ўзбекистон Республикасининг конституциявий тузумига тажовуз қилиш) ва 244-1-моддалари (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) билан жиноят иши қўзғатилиб, қидирув эълон қилинган.
Бундан аввал халқаро террорчилик ташкилоти сафларига қўшилган ўзбекистонлик эркак ва унинг ўғли қидирувга берилгани хабар қилинганди. Шунингдек, қизлари билан халқаро террорчилик ташкилоти жангарилари аъзоси бўлган ўзбекистонлик аёл ҳам қидирилмоқда. Ушбу аёл ҳам Россияда яшовчи эркак билан танишиб, икки қизи билан дастлаб Озарбайжон орқали Туркияга, у ердан эса Сурияга борган ва халқаро террорчилик ташкилотининг жангариларига бориб қўшилган.
Изоҳ (0)