Россиялик миллиардер Алексей Кузмичев Францияда ҳибсга олинди, бироқ унга нисбатан ҳеч қандай айблов қўйилмаган. Бу ҳақда Франция прокуратурасига таяниб, Le Monde хабар берди.
Маълум қилинишича, Алексей Кузмичев солиқ тўлашдан бўйин товлаганлик, пул ювиш ва халқаро санкцияларни бузганликда айбланиб, сўроқ қилиш учун Францияда ҳибсга олинган. Кузмичевнинг Париждаги уйида ва Провансдаги департаментида тинтувлар бўлиб ўтган.
“Кузмичев ҳамон ҳибсда, аммо бу иш бўйича унга қарши айбловлар ҳали қўйилмаган”, — деб ёзади Reuters.
Кузмичевнинг адвокати билан боғланиб бўлмаган.
Ўтган йили Франция божхоначилари Кузмичевнинг Россия президенти Владимир Путин билан алоқалари бўйича жорий этилган Европа Иттифоқи санкциялари доирасида 27 метрлик La Petite Ource яхтасини мусодара қилганди. Миллиардер Аlfа Group асосчиси ва Аlfа Bank’нинг собиқ акциядори бўлиб Франция ҳукуматини судга берган.
Тадбиркорга яқин бўлган BBC манбаси тинтувлар ҳақидаги маълумотни тасдиқлаган ва Кузмичев билан боғлиқ турли манзилларга ўнлаб полициячилар келганини айтган.
Le Monde нашрининг ёзишича, бизнесменнинг Париждаги уйи ва Санкт-Тропездаги вилласида ўтказилган тинтувлар чоғида, бошқа нарсалар қаторида, пуллар ҳам топилган. Кузмичев Аlfа Group’нинг бошқа асосчилари билан бирга Европа Иттифоқи ва АҚШнинг санкциялар рўйхатига киритилган. Le Monde нашрининг ёзишича, санкциялар 2022 йилнинг март ойида кучга кирганида Кузмичев аллақачон Францияда бўлган.
Ўтган йилнинг декабрь ойида Аlfа Group’нинг яна бир асосчиси Михаил Фридманнинг Лондондаги саройида тинтув ўтказилган. Тадбиркор санкцияларни четлаб ўтиш учун тил бириктириш, пул ювиш ва ёлғон гувоҳлик беришда гумон қилинган.
Изоҳ (0)