Украинага ҳужум арафасида Москвадан қочган, Россия президенти Владимир Путиннинг оиласи томонидан фойдаланилган шахсий самолёт энди Австрияда жойлашган рус олигархлари билан алоқадор чартер компанияси томонидан бошқарилади. Журналистлар тегишли суриштирувни эълон қилди.
Россиянинг “Важние истории” мустақил нашри Путиннинг миллиардер дўсти Геннадий Тимченко томонидан сотиб олинган 60 миллион долларлик шахсий самолёт тафсилотларини ошкор қилди. Суриштирувда авиатехника Путиннинг оила аъзолари, жумладан, унинг қизи Катерина Тихоновага хизмат қилгани аниқланди.
Gulfstream G650 самолёти Тимченкога 2014 йилда АҚШ санкциялари остида қолганида сотилганди.
Шундан сўнг у турли мамлакатларнинг самолётлари реестрларига ўтказилган, самолётнинг рўйхатга олиш рақами ўзгартирилган. Ҳужжатларда самолёт эгаси сифатида кўрсатилган оффшор компаниялар бир неча бор ўзгарган ва 2018 йилда Россия тўғридан тўғри инвестиция фондининг шўба корхонаси Amerivo Holdings Limited’га ўтган.
2021 йилда самолёт Австриянинг Аvcon Jet чартер компаниясига топширилган, у энг йирик бизнес авиация операторларидан биридир. Компаниянинг собиқ эгалари “Газпромбанк” раҳбари Андрей Акимовнинг собиқ рафиқаси Елена Акимова ва Путиннинг дўстлари билан боғлиқ бизнесларга алоқадор.
Newsweek нашри изоҳ олиш учун электрон почта орқали Avcon Jet билан боғланган.
“Компания Россия президентига яқин кишиларга хизмат кўрсатиш бўйича узоқ тарихга эга”, — деб жавоб берган компания расмийси ва самолёт 2022 йил 23 февралда, Путин Украинага бостириб киришидан бир кун олдин Москвадан Женевага учганини айтган. Самолётда ким бўлгани эса номаълум.
Avcon Jet мамлакатда 2012 йилги сайловлар олдидан бир гуруҳ Путин тарафдорларини Россия бўйлаб олиб юрган.
Шунингдек, чартер компания россиялик олигарх ва Путиннинг иттифоқчиси Борис Ротенбергга тегишли самолётга хизмат кўрсатган ва 2014 йилда АҚШ санкциялари киритилганидан кейин ҳам буни давом эттирган.
Изоҳ (0)