Фарғона вилоятининг Қўқон шаҳрида электр энергиясидан ноқонуний фойдаланиб келган майнинг ферма аниқланди. Бу ҳақда “Ҳудудий электр тармоқлари” АЖ матбуот хизмати хабар берди.
Маълум қилинишича, бу “Фарғона ҲЕТК” АЖ ҳамда тегишли ташкилотлар вакиллари ҳамкорлигида истеъмолчиларнинг ноқонуний электр энергиясидан фойдаланишларини олдини олиш мақсадида Қўқон шаҳрида ўтказилган тунги рейд давомида аниқланган.
Шаҳарнинг “Аччиқкўл” маҳалла фуқаролар йиғини ҳудудида жойлашган паррандачилик цехида фуқаро М.Н. электр ҳисоблагичсиз, ўзбошимчалик билан майнинг қурилмалари, совутиш ва ёриткич мосламалари ҳамда бошқа электр қурилмаларини тўғридан тўғри электр тармоғига улаган ҳолда, ноқонуний фойдаланиб келаётгани маълум бўлган ҳамда мазкур ҳолат бўйича далолатнома расмийлаштирилган.
Дастлабки қайта ҳисоб-китобларга кўра, М.Н. томонидан “Фарғона ҲЕТК” АЖ манфаатига 2,8 миллион кВт. ёки 2,5 миллиард сўм зарар етказилган.
Мазкур ҳолат юзасидан президентнинг тегишли қарорларига асосан ноқонуний фойдаланилган майнинг фермаларига нисбатан 5 баробар ўсувчи коэффициент қўлланиб, 12,3 млрд сўм маблағ ундиришга ҳужжатлар расмийлаштирилди. Ҳуқуқбузарга 5 баробар ўсувчи коэффициент билан жарима тариқасида 9,9 миллиард сўм қўшимча ҳисоб-китоб қилинди.
Ҳозирда тегишли ташкилотлар томонидан мазкур ҳолат юзасидан ўрганишлар олиб борилмоқда.
Бундан аввал Навоийда давлатга 24,4 миллиард сўм зарар келтирган ноқонуний майнинг ферма аниқланганди.
Изоҳ (0)