Минус ҳароратда электромобилдан фойдаланишдан олдин уни қиздириб ҳаракатланиш батареяга юклама тушмаслигига ёрдам беради. Бу ҳақда техника фанлари бўйча фалсафа доктори Фикрет Умеров “Дарё” мухбирига берган интервьюсида айтиб ўтди.
Фикрет Умеровнинг маълум қилишича, минус ҳароратда турган электромобилни қиздириб туриш вақти машинанинг технологик имкониятларидан келиб чиққан ҳолда турлича бўлади.
“Ўзимизни синовимиздан ўтган электромобилни етарли ҳароратга чиқиши учун батареяни 10 дақиқача қиздириш керак, деган фикрга келдик. Қиздирмасдан ҳам юриш мумкин, лекин бунда батарея зўриқиб ишлайди. Агар электромобил ёпиқ жойда турган бўлса, ҳаракатланишдан аввал қиздириш шарт эмас”, — деди мутахассис.
Унинг қўшимча қилишича, ҳарорат плус 10-15 градус бўлса ва электромобилни 10-15 дақиқа қувватлагичга қўйган бўлсак, қиздирмасдан ҳаракатланиш мумкин.
“Печкани ёққан вақтда, салон ва батарея қизийди. Циркулация бўлган вақтда тен ва чиллерлар суюқликни ҳайдаган ҳолатда қиздириб беради. Бунда аккумулятор ўртасидаги қутичалар юрган ҳолатда суюқлик батарея қутичаларини қиздиради. Электролит қизиб олганидан кейин, машина актив ҳолатга келади”, — деди Фикрет Умеров.
Аввалроқ электромобил қандай ҳолатда ёниши ва портлаши ҳақида тушунтириш берилган эди.
Изоҳ (0)