27 октябрь куни Оқ уй веб-сайтида эълон қилинган баёнотга кўра, АҚШ ва Хитой Си Цзиньпин ҳамда Жо Байден ўртасида учрашув ташкил этиш устида биргаликда ишламоқда. Давлат раҳбарларининг учрашуви 11—17 ноябрь кунлари Сан-Франсискода, APEC (Asia-Pacific Economic Cooperation) саммити доирасида бўлиб ўтиши кутилмоқда, дейилади баёнотда.
Байден 27 октябрь куни Вашингтонда Хитой ташқи ишлар вазири Ван И билан учрашди. У ҳар икки давлат очиқ мулоқот каналларини сақлаб туриши ва “ўзаро муносабатлардаги рақобат масалаларига масъулият билан ёндашиш” кераклигини таъкидлади. Бундан ташқари, Америка етакчиси Пекинни “глобал муаммоларни” ҳал этишда биргаликда ишлашга чақирди ҳамда Хитой давлат кенгаши собиқ бош вазири Ли Кецяннинг вафоти муносабати билан ҳамдардлик билдирди.
Ван И Блинкен ва Салливан билан Хитой—АҚШ муносабатларини муҳокама қилди
Хитой Ташқи ишлар вазирлиги раҳбари 26 октябрь куни АҚШга уч кунлик ташриф билан келганди. У АҚШ давлат котиби Энтони Блинкен билан икки марта учрашди. Сиёсатчилар музокаралар ортидан ҳеч қандай баёнот бермади, бироқ улар бошланишидан олдин Ван И АҚШ ва Хитой ўртасида нафақат келишмовчиликлар, балки умумий манфаатлар ҳам борлигини, “ҳар икки давлат ҳам кенг қамровли мулоқотга муҳтожлигини” таъкидлади.
Бундан ташқари, Хитой вазирини АҚШ президентининг миллий хавфсизлик бўйича маслаҳатчиси Жейк Салливан қабул қилди. Учрашувда “АҚШ ва Хитой ўртасидаги икки томонлама муносабатларнинг асосий масалалари, Исроил ва ҲАМАС ўртасидаги можаро, Россиянинг Украинага қарши уруши” ҳамда Пекин ва Тайван ўртасидаги кескин муносабатлар муҳокама қилинди, дейилади Оқ уй матбуот хизмати хабарида.
Reuters агентлигининг қайд этишича, Ван Ининг сафари юқори мартабали хитойлик сиёсатчининг АҚШга сўнгги йиллардаги биринчи ташрифи бўлди.
Изоҳ (0)