Эрон АҚШга қарши “янги фронтлар” очиш билан таҳдид қилди

АҚШ Исроилни ҳар томонлама қўллаб-қувватлашда давом этса, унга қарши янги фронтлар очилиши мумкин, деди Эрон ташқи ишлар вазири Ҳусайн Амир Абдуллоҳиян Bloomberg Television’га берган интервьюсида.

“АҚШ бошқаларга вазминликни тавсия қиляпти, бироқ у бутунлай Исроил томонига ўтиб олди. Агар Америка шу пайтгача қилган ишларини яна давом эттирса, АҚШга қарши янги фронтлар очилади” — деди у ва Ғазо секторидаги мавжуд вазиятнинг давом этиши минтақадаги вазиятнинг назоратдан чиқиб кетишига олиб келишини қўшимча қилди.

ТИВ раҳбарининг бу сўзлари АҚШнинг Суриядаги объектларга берган зарбаларидан сўнг янгради — Вашингтон бу объектлардан Эрон томонидан қўллаб-қувватланадиган гуруҳлар фойдаланади, деб ҳисоблайди. АҚШ Суриядаги Америка контингентига қилинган ҳужумлар учун ушбу гуруҳларни жавобгар деб билади ва зарбалар ўзини ҳимоя қилиш мақсадида амалга оширилганини таъкидлайди. Оқ уй зарбаларни Эронга огоҳлантириш деб атади.

Абдуллоҳиян, ўз навбатида, Америка ҳарбий базаларига ҳужум қилаётган гуруҳлар мустақил ҳаракатланишини, Теҳрондан ҳеч қандай буйруқ олмаслигини айтди.

“Биз Сурияга ёки минтақанинг бошқа қисмларига янги қўшин юборганимиз йўқ. Аммо воқеалар ривожини шунчаки кузатмаяпмиз. Эрон Ислом Республикаси миллий манфаатларимиздан келиб чиққан ҳолда чора кўради”, — дея қўшимча қилди у.

Абдуллоҳияннинг сўзларига кўра, Исроил Ғазо секторида қуруқликдаги операцияни бошласа, янги фронтлар очилиши муқаррар бўлади.

“Ҳар қандай фронт очилиши мумкин”, — деб таъкидлади Эрон вазири.

Исроил кучлари 27 октябрь оқшомида Ғазо секторида қуруқликдаги операцияни “кенгайтираётгани”ни, шунингдек, ҳаводан, ердан ва денгиздан ҳужумлар интенсивлигини оширганини маълум қилди. Исроил армияси “кенгайиш” нимани англатишига аниқлик киритимади. Мутахассисларнинг фикрича, жанговар ҳаракатларнинг кучайиши ҳали кенг кўламли босқиннинг бошланиши, дегани эмас.

Исроил зарбаларидан кейин минтақада алоқа узилди, интернет узилишлар билан ишламоқда. Қизил Ярим Ярим Ой Жамияти, ЖССТ ва “Чегара билмас шифокорлар” анклав ичидаги ходимлари билан алоқа узилгани ҳақида хабар берди.