“Пулсизлик нима эканлигини мендан сўранг” — Дилшод Мирзамуродов ота соғинчи, ғамларни унутиш учун кулиши ва сёмкадан кейин тоби қочиши ҳақида 

Комик актёр Дилшод Мирзамуродов журналист Мерон Муҳаммадазизга берган интервьюсида ҳаётидаги энг қийин кунлар ва отаси билан боғлиқ хотиралари ҳақида сўзлаб берди.

— Қийинчиликлар ҳақида гапириш эркак кишига хос эмас. Аммо айримлар ўзига тегишли хулоса чиқаришар, деган умидда айтиб бераман. Оиламизнинг моддий аҳволи жуда оғир бўлган. Отам устачилик билан шуғулланарди. Меҳнат қилгандан кейин пул бермаслик ҳолатлари ҳам бўларди. Тасаввур қилинг, биз оиламиз билан отам пул олиб келишини кутардик, аммо отамнинг хорғин юз қиёфаси умидларимизни сўндирарди.

Санъаткор бўламан, деб Тошкентга ўқишга кирганимда маҳалламиздаги айрим инсонлар “Алкаш бўларкансан-да”, дейишган. Кўнглимга оғир ботган, аммо ичимдагини сиртимга чиқармаганман.

Институтда ўқиётганимда ҳар шанба уйга бориб, якшанба куни кечки пайт яна Тошкентга қайтардим. Шундай вазият бўлганки, туфлигим йўқлиги учун маҳалла бошида турадиган қариндошимизнинг пойабзал ини кийишимга тўғри келган. Шанба куни ёмғир шаррос ёғаётган пайтда қариндошим туфлисини кутиб ўтирган экан. Туфлини ечиб, унга берганман ва уйгача ялангоёқ борганман. Ўша пайтда ичимдан нималар ўтганини тасвирлаб беролмайман. Хуллас, пулсизлик нима эканлигини мендан сўранг, дегим келади.

Ҳар ҳафта Тошкентга яшаш учун уйдан 25 минг сўм пул олиб келардим. Пулим йўқ, аммо дунёда ота-онамдан пул сўрашдан-да оғирроқ иш йўқ эди. Балки Тошкентда ейишимга нон ёпиб беринг, деймикан деб хаёлимдан ўтказдим. Аммо у пайтлари қоплаб ун олишга шароитимиз йўқ эди. Агар пакетдаги унга нон ёпиб беришса, ўзлари нима қилишади, деб ўйладим. Кечаси ота-онам қаергадир кетишди ва тонг саҳарда уйга қайтишди. Аммо қаерга боришганини айтишгани йўқ. Отам вафот этганидан кейин онам ўша тун қаерга кетишгани ҳақида айтиб қолди. “Пойтахтга қайтишинг учун пул тополмаганмиз. Охири боғбондан иш сўраб, боғда тонгга қадар ярим арава олма терганмиз. Меҳнатимиз эвазига боғбон бир қоп олма берган, уни бозорда сотиб, йўлкирангга пул берганмиз, деди. Мен ҳам отаман, аммо фарзандларим учун шундай мардлик қилолармиканман, деб роса ўйладим. Бунча олмани қоронғида териш қанчалик азоб эканлигини тасаввур қиляпсизми?, — дейди актёр Дилшод Мирзамуродов.

Дилшод Мирзамуродов унга ишониб рол топширишмагани ва мардлик қилгани учун Жаҳонгир Позилжоновдан миннатдорлиги ҳақида гапирди.

— Талабалигим билан боғлиқ оғриқли хотираларим кўп. Масалан, пул йўқлиги учун кун давомида фақатгина бир марта овқатланардим. Истаймизми-йўқми, барибир кўп нарса моддият билан боғлиқ экан. Пулим бўлмагани учун ҳам кўпчиликка қўшилмасдим. Курсдошларим билан тушлик қилгим келарди, аммо ўзимни четга олишга мажбур эдим. Ўша пайтда кўп курсдошларим машҳур эди. Ҳатто режиссёрларига бориб, “Фильмингда кичикроқ бўлса ҳам рол бер”, деган пайтларим ҳам бўлган. Аммо у пайтда режиссёрлар кассани ўйларди. Шу боис “Сени ҳеч ким танимайди-да”, дерди. Уларни ҳам тушунаман, аммо бирор марта имконият беришмагани кўнглимни оғритган. Жаҳонгир Позилжонов сабаб илк ролимни ижро этганман. У менга ишонган, бошловчи бўлишимга ҳам у сабабчи бўлган, — дейди Дилшод Мирзамуродов.

“Борига барака” шоуси билан томошабинларга яхши таниш бўлган Дилшод Мирзамуродов сёмкалардан кейин тоби қочиши ҳақида ҳам гапирди.

— Кўз бор нарса, кўпчилик билан ишлаш жуда қийин. Ҳаётда ниҳоятда жиддий инсонман, деярли кулмайман. Аммо саҳнада мени фақат кулиб юрадиган инсон қиёфасида кўришган. Ишонасизми, суратга олиш жараёнларидан кейин тобим қочади. Оғирлашиб қоламан.

Уйда деярли гапирмайман. Дўстларим даврасида эса ғамларимни унутиш учун кулиб ўтиришим мумкин. Аммо барибир у ҳақиқий Дилшод эмаслиги ўзимга сезилади, — дейди комик актёр Дилшод Мирзамуродов.