Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи, ишлаб чиқарувчилари томонидан 2021 йилда қайта рўйхатдан ўтказилаётганда GMP сертификатининг муддати ўтган бўлса-да, Ўзбекистондаги дорихоналарда сотилишига рухсат берилган. Айнан ўша даврда сиропнинг таркибида заҳарли моддаси бўлган 39 600 та флакони мамлакатга олиб кирилган. Бу ҳақда “Док-1 Макс” сиропи билан боғлиқ жиноят иши кўриб чиқилаётган суднинг 23 октябрь куни бўлиб ўтаётган мажлисида хабар берилди.
Судда гувоҳлик қилганлардан бирининг судья саволига жавоб беришича, “Док-1 Макс” сиропи ишлаб чиқарувчиси Marion Biotech PVT. Ltd корхонаси сиропни Ўзбекистонда қайта рўйхатдан ўтказиш учун “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКнинг рўйхатдан ўтказиш бўлимига ҳужжатларини тақдим қилган.
Ҳужжатлардаги GMP сертификатининг муддати тугаётган бўлган ва қайта рўйхатдан ўтказиш давомида салкам икки ой давомида GMP сертификатсиз бўлган. Бу пайтда эса Ўзбекистондаги дорихоналарда “Док-1 Макс” сиропи сотилишда давом этган. Айнан шу муддат ичида Ҳиндистондан Ўзбекистонга 39 600 флакон таркибида заҳарли модда бўлган сироп олиб кирилган.
Мазкур ҳолатни очиқлаган судья гувоҳга ҳужжатларда камчилик бўлган бўлса, нега бундай ҳолат юзага келган дея савол берди. Гувоҳ бу ҳолатга у жавобгар эмаслигини билдиргач, судья Фармацевтика тармоғини ривожлантириш агентлиги собиқ раҳбари С.К.га юзланиб, вазиятга изоҳ сўради.
“Док-1 Макс”нинг 39 600 флакони ишлаб чиқарувчи Marion Biotech PVT. Ltd корхонасининг GMP сертификати бор пайтда ишлаб чиқарилгани учун сертификати муддати тугаган пайтда ҳам Ўзбекистонга олиб кирилишига ҳамда дорихоналарда сотилишига рухсат берилган, — дея ҳолатга изоҳ берди Фармацевтика тармоғини ривожлантириш агентлиги собиқ раҳбари С.К.
Изоҳ (0)