Исландияда ўн минглаб аёллар 24 октябрь куни гендер иш ҳақи тенгсизлигига қарши норозилик билдириш мақсадида бир кунлик иш ташлаш ўтказмоқчи. Бу ҳақда Тhе Guardian хабар берди.
Исландия гендер тенглиги бўйича дунёдаги энг илғор мамлакатлардан бири ҳисобланади. Мамлакат Жаҳон иқтисодий форумининг йиллик Глобал гендер фарқи ҳисоботида 14 йил кетма-кет дунё мамлакатлари орасида биринчи ўринни эгаллаб келмоқда.
Иш ташлаш ташкилотчиси Фрея Стейнгримсдоттир Исландия “тенглик жаннати” деб аталса-да, мамлакатда гендер тенгсизлик ҳали ҳам мавжудлиги ва унга қарши курашиш учун “шошилинч чоралар кўриш зарур”лигини кўрсатмоқчи. Унинг сўзларига кўра, анъанавий равишда кўпроқ аёлларни иш билан таъминлайдиган соҳалар, масалан, соғлиқни сақлаш ва болаларга ғамхўрлик қилиш “етарлича баҳоланмаяпти ва жуда кам ҳақ тўланяпти”.
Айни пайтда Фрея Стейнгримсдоттир, Исландия Статистика бошқармаси маълумотларига кўра, мамлакатда ҳали ҳам аёллар эркакларникидан камида 20 фоиз кам маош оладиган тармоқлар мавжудлигини таъкидлади. Исландия университети томонидан олиб борилган тадқиқот шуни кўрсатдики, исландиялик аёлларнинг 40 фоизи ҳаёти давомида гендер ёки жинсий зўравонликка дучор бўлишади.
Иш ташлаш “Сиз буни тенглик дейсизми?” шиори остида ўтказилади. Унинг доирасида иштирокчилар аёлларга пуллик ва пул тўланмайдиган ҳар қандай ишни бажаришдан бош тортишни таклиф қилмоқда (масалан, уй ишлари). Рейкявик марказида 25 минг кишилик марш режалаштирилган.
Исландия бош вазири Катрин Якобсдоттир иш ташлашда иштирок этишини эълон қилди.
- Аёлларнинг бундай кенг кўламли иш ташлаши охирги марта Исландияда 1975 йилда бўлиб ўтган.
- Ўшанда Исландия аёллари эркакларникидан ўртача икки баравар кам маош олишарди. Иш ташлашда мамлакат аёлларининг 90 фоизи қатнашган.
- Акция 1976 йилда мактабларда ва иш жойларида жинсга қараб камситишни тақиқловчи Тенглик тўғрисидаги қонуннинг қабул қилинишига олиб келди.
- Тўрт йил ўтгач, Вигдис Финнбогадоуттир конституциявий давлат раҳбари лавозимига сайланган дунёдаги биринчи аёл бўлди.
Изоҳ (0)