Исроил сиёсий раҳбарияти агар ҲАМАС гаровга олинганларни озод қилишда давом этса, Ғазо секторига қуруқликдан бостириб кириш режаларини бекор қилиши ёки босқинни қисқа вақтда тўхтатиши мумкин. The Times оf Israel нашрининг ёзишича, Исроил армияси қўмондонлиги орасида бундай хавотир кенг тарқалган.
Шу билан бирга Исроил армияси қўмондонлиги ҲАМАСга қарши қуруқликдаги операция асирга олинган исроилликларни озод қилишни тезлаштиради, деб ҳисобламоқда. Ҳарбийлар ҳукумат тез орада босқинни бошлаш ҳақида қарор қабул қилишига умид билдирмоқда, чунки чегара бўйлаб жойлашган қўшинлар фақат чекланган вақт давомида юқори тайёргарлик ҳолатида туриши мумкин.
ҲАМАСга қарши 16 кунлик ҳаво ҳужумларидан сўнг Исроил армияси ҳукуматга Ғазо секторида қуруқликдан ҳужум бошлашга тўлиқ тайёр ва ҳатто ҳарбийлар орасида оғир талофатлар ҳамда “Ҳизбуллоҳ” гуруҳининг мамлакат шимолидаги ҳужумларига қарамай, ўз мақсадларига эриша олишига ишончи комил эканини айтган, деди манбалар.
Аввалроқ ҲАМАС гаровга олинган икки нафар исроиллик аёл озод этилгани ҳақида эълон қилганди. The Times оf Israel ёзишича, гап Нир-Оз киббуцида истиқомат қилувчи Исроил фуқаролари, 79 ёшли Нурит Купер ва 85 ёшли Ёхавед Лифшитс ҳақида кетмоқда. Уларнинг турмуш ўртоқлари Ғазода гаровда қолмоқда.
Изоҳ (0)