АҚШ давлат котиби Энтони Блинкен қонунчиларнинг кичик гуруҳи билан Қорабоғдаги вазият бўйича телефон мулоқотини ўтказди, деб хабар беради Politico.
Қайд этилишича, дипломат Давлат департаменти “Озарбайжоннинг Арманистонга бостириб кириш эҳтимолини кузатиб бораётгани” ва “яқин ҳафталар ичида Арманистоннинг жанубий ҳудудларига ҳужум бўлиши мумкин” дея ҳисоблашини айтган.
Телефон мулоқоти 3 октябрда бўлиб ўтган. Қорабоғдаги вазият кескинлашгани муносабати билан Озарбайжонга қарши кўрилиши мумкин бўлган чора-тадбирлар муҳокама қилинган. Блинкеннинг айтишича, Оқ уй Озарбайжонни жавобгарликка тортиш имкониятини қидирмоқда. Таъкидлашича, ҳукумат Бокуга ҳарбий ёрдам кўрсатиш масаласини қайта кўриб чиқиши мумкин.
Озарбайжон 19—20 сентябрь кунлари “аксилтеррор чоралари” натижасида Қорабоғ ҳудуди устидан назоратни тўлиқ тиклади. 1990 йилларнинг бошидан бери мавжуд бўлган тан олинмаган Тоғли Қорабоғ Республикасининг ҳокимияти ўз-ўзини тарқатиб юборди. Икки ҳафтадан камроқ вақт ичида у ерда яшовчи 120 минг этник армандан 100 минги Қорабоғни тарк этди.
Ўтган ҳафта БМТнинг Гаагадаги Халқаро суди Арманистоннинг Озарбайжонга қарши Қорабоғдаги арман аҳолисига нисбатан камситишнинг олдини олиш бўйича вақтинчалик чоралар кўриш талаб қилинган даъвоси бўйича очиқ эшитувлар ўтказишни белгилаганди.
Изоҳ (0)