AQSH davlat kotibi Entoni Blinken qonunchilarning kichik guruhi bilan Qorabog‘dagi vaziyat bo‘yicha telefon muloqotini o‘tkazdi, deb xabar beradi Politico.
Qayd etilishicha, diplomat Davlat departamenti “Ozarbayjonning Armanistonga bostirib kirish ehtimolini kuzatib borayotgani” va “yaqin haftalar ichida Armanistonning janubiy hududlariga hujum bo‘lishi mumkin” deya hisoblashini aytgan.
Telefon muloqoti 3-oktyabrda bo‘lib o‘tgan. Qorabog‘dagi vaziyat keskinlashgani munosabati bilan Ozarbayjonga qarshi ko‘rilishi mumkin bo‘lgan chora-tadbirlar muhokama qilingan. Blinkenning aytishicha, Oq uy Ozarbayjonni javobgarlikka tortish imkoniyatini qidirmoqda. Ta’kidlashicha, hukumat Bokuga harbiy yordam ko‘rsatish masalasini qayta ko‘rib chiqishi mumkin.
Ozarbayjon 19—20-sentyabr kunlari “aksilterror choralari” natijasida Qorabog‘ hududi ustidan nazoratni to‘liq tikladi. 1990-yillarning boshidan beri mavjud bo‘lgan tan olinmagan Tog‘li Qorabog‘ Respublikasining hokimiyati o‘z-o‘zini tarqatib yubordi. Ikki haftadan kamroq vaqt ichida u yerda yashovchi 120 ming etnik armandan 100 mingi Qorabog‘ni tark etdi.
O‘tgan hafta BMTning Gaagadagi Xalqaro sudi Armanistonning Ozarbayjonga qarshi Qorabog‘dagi arman aholisiga nisbatan kamsitishning oldini olish bo‘yicha vaqtinchalik choralar ko‘rish talab qilingan da’vosi bo‘yicha ochiq eshituvlar o‘tkazishni belgilagandi.
Izoh (0)