Ўзбекистон давлат драма театри актрисаси Малика Авазова эгизак фарзандларни дунёга келтирди. У тўрт йилдан буён фарзандли бўлишни интизор бўлиб кутгани ва уни қўллаб-қувватлагани учун турмуш ўртоғидан миннатдор эканлигини айтиб ўтди.
— Аллоҳимдан битта фарзанд сўрагандик, иккита фарзанд билан сийлади. Турмуш ўртоғим билан бирга тўрт йил давомида фарзандли бўлишни кутдик. Ўзбекчиликда ҳар хил гап-сўзлар бўлади, уларни енгишимда турмуш ўртоғимнинг далдаси катта бўлди. Ҳаётимизда анча муаммоли вазиятлар бўлди. Чиройли сабримизнинг нишонаси сифатида берилган эгизак фарзандлар ҳақида эшитиб қувондик. Ҳозирча уйқу йўқ, чунки улар мослашиб олиши учун озгина вақт керак экан. Ярим кечаси учда уйғонишади. Уларни парваришлашда турмуш ўртоғим катта ёрдам беряпти, — дейди актриса.
Актриса нима сабабдан фарзандларига Ҳасан ва Ҳусан исмларини қўймагани ва чақалоқларини ташлаб киносёмкаларда ҳам иштирок этаётгани ҳақида сўзлаб берди.
— Турмуш ўртоғим “Ўғил фарзандли бўлсам, Муҳаммадали деб исм қўяман”, деб ният қиларди. Эгизак ўғил фарзандли бўлишимиз ҳақида эшитиб, қувондик ва исм танлашни бошладик. Қайнотам раҳматлининг исми Ҳасан бўлган, улар ҳам эгизак бўлишган экан. Такрор бўлмасин, бобосининг исмини ўғилларимизга қўймайлик деб бошқа исм қўйишга қарор қилдик. Ўғилларимизга Муҳаммадали ва Муҳаммадамин деб исм қўйдик.
Фарзандли бўлганимдан бор-йўғи тўққиз кун ўтиб, киносёмкада иштирок этишимга тўғри келди. “Йўқ, боролмайман, ҳали чиллам ҳам чиққани йўқ. Қайнонамнинг жаҳли чиқади”, дейишимга қарамай, режиссёр “Келмасангиз бўлмайди, фақат сизнинг кадрларингиз қолди”, деди. Фарзандли бўлмасимдан аввал давлат фильмларидан бирида суратга тушишга рози бўлгандим. Улар шошилинч тизер суратга олиб, раҳбариятга кўрсатишлари керак экан. Чақалоқларимнинг ухлаш пайтини мўлжаллаб, сёмкага бордим ва 15 дақиқада тасвирга олиш ишларини якунлаб, уйга қайтдим. Энг қизиғи, видеони Instagram тармоғига жойласам, ҳамма танишлари қайнонамга қўнғироқ қилиб, “Қанақасига сёмкаларга кетди?” деб ҳайрон бўлишибди. Ҳозирча аввалгидек ижодга қайтиш ниятим йўқ. Болаларимни катта қилиб, кейин ҳотиржам ижод қиламан, — дейди актриса Малика Авазова.
Эслатиб ўтамиз, Малика Авазова театр ва кинода роллар ижро этиш билан бирга Тошкент темирйўл вокзалида назоратчи бўлиб ҳам ишлайди.
Изоҳ (0)