Ижтимоий тармоқларда ўзбек шоу-бизнеси вакилларининг турмуш ўртоқлари ҳам фаол. Улар ижтимоий тармоқларда машҳурлик борасида турмуш ўртоғидан кам эмас. Хўш, улар қандай мазмунда блог юритади ва уларни қанча обуначи кузатади?
Камола Ортиқова
Собиқ “Уммон” гуруҳи хонандаси Зоҳид Рисқиевнинг турмуш ўртоғи Камола Ортиқова оила қурмасидан аввал тўй хизматларида бек-вокал хонандаси сифатида фаолият юритган. У пайтда кузатувчилари у қадар кўп эмасди. Зоҳид Рисқиев билан оила қургач, Instagram’даги кузатувчилари сони кескин ошди. Унинг кундалик ҳаёти акс этган расм ва видеоларни 465 мингдан ортиқ обуначи кузатади.
— “Рекламаларни кўп жойлайсиз” деб негатив фикр билдирадиганлар, айни кунда бола тарбияси билан бандман. Оиланинг асосий харажатлари менинг зиммамда. Турмуш ўртоғимнинг даволаниши ҳам арзонга тушмайди, — деб ёзади Камола Ортиқова.
Ҳуснора Муқимова
Хонанда Шароф Муқимовнинг турмуш ўртоғи Ҳуснора Муқимова Instagram фойдаланувчиларига фудблогер сифатида яхши таниш. Унинг постларини 123 мингдан ортиқ обуначи кузатади.
Шароф Муқимов 2018 йили Ҳуснора исмли қиз билан танишиб, 2019 йилнинг июнь ойида унга уйланди. 2021 йилнинг декабрь ойида ўғил фарзандли бўлишди.
Ҳуснора талаба, шу билан бирга, Instagram’да ҳам фаол. У мазали егуликлар билан турмуш ўртоғини хурсанд қилишни яхши кўради. Шароф Муқимов турмуш ўртоғига Tracker автомобилини совға қилган ва бахтли кунлар учун унга миннатдорлик билдирган.
Маржона Собирова
Ҳамдам Собировнинг турмуш ўртоғи Маржона икки фарзандни тарбиялаш билан бирга инстаблогерлик билан ҳам шуғулланади. Тўғри, унинг обуначилари у қадар кўп эмас.
— Тадбиркорлик билан шуғулланаман, фақат айнан қайси йўналишда эканини ошкор этолмайман. Ҳозирги кунда кўпроқ болаларим билан бандман, — дейди Маржона Собирова.
Шаҳноза Алиева
Шаҳноза Алиева “Қадам” сериали билан томошабинларга яхши таниш бўлган актёр Муҳаммадали Алиевнинг турмуш ўртоғи ҳисобланади. Шаҳноза малакали психолог, аммо ҳозирда Асмира ва Салма исмли қизалоқларининг парвариши билан банд.
Унинг оиласи ва кундалик ҳаёти билан боғлиқ видеоларни 20 мингга яқин обуначилар кузатишади.
Шаҳло Раметова
Instagram’да Настарин номи остида танилган блогер Шаҳло Раметова актёр Азиз Раметовнинг турмуш ўртоғи ҳисобланади. Дизайнер актёр билан оила қурмасидан аввал ҳам Instagram’да фаол бўлган. У фақатгина ўғли Муҳаммадаминнинг парвариши билан банд бўлмай, фаолиятини давом эттиришга ҳам вақт топяпти. Уни Instagram’да 124 мингдан ортиқ обуначи кузатади.
Шаҳло Раметова қўл ишларидан ташқари, оиласи ва ошхонадаги фаолияти акс этган видеоларни ҳам тармоққа жойлайди.
Ирода Усмонова
Режиссёр Зебо Наврўзованинг кенжа келини Ирода Усмонова ҳам ижтимоий тармоқларда жуда фаол. У турмуш ўртоғи актёр Муҳаммадали Усмонов билан боғлиқ ҳаётини кузатувчилари билан бўлишади. Қизиғи, унинг ҳаётини 521 мингдан ортиқ обуначилар кузатиб боришади.
Хумора Йўлдошева
Хумора Йўлдошева режиссёр Зебо Наврўзованинг иккинчи келини ҳисобланади. У хонанда Шуҳрат Йўлдошев билан оила қурган. Хумора Йўлдошева профессионал визажист бўлиб ишлайди. Унинг пардоз-андоз борасидаги видеоларини 366 минг обуначи кузатиб боради.
Зарина Умрзоқова
Актёр ва продюссер Азиз Умрзоқовнинг турмуш ўртоғи Зарина Умрзоқова ҳам Instagram тармоғида жуда фаол. Унинг профилини 132 мингдан ортиқ обуначи кузатади. У бир неча йилдан буён косметолог сифатида фаолият юритади. Шу боис Instagram профини ривожлантиришга алоҳида эътибор беради. Чунки бугунги кунда Instagram реклама постларини жойлаш ва мижозларни тўплаш учун жуда қулай.
Маҳбуба Ҳикматова
Комик актёр Асқар Ҳикматовнинг турмуш ўртоғи Маҳбуба Ҳикматова ҳам Instagram’да жуда фаол. У бир неча йиллик тажрибага эга болалар уқаловчиси бўлиб ишлайди. Унинг постларини 42 мингдан ортиқ обуначи кузатади.
Изоҳ (0)