Самарқанд ва Сурхондарё вилоятларида пул эвазига ўқишга киритиб қўйишни ваъда қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Самарқанд вилоят бошқармаси томонидан фуқароларнинг ҳуқуқ ва манфаатларини ҳимоя қилиш юзасидан терговга қадар текширув ўтказилган. Теширувда муқаддам фирибгарлик ва бошқа жиноятлари учун судланган Н.М. фуқаролар Х.А., Д.Ж. ва Ғ.Ж.нинг ишончига кириб, уларнинг фарзандларини гўёки юқори лавозимда ишловчи танишлари ёрдамида Тошкент тиббиёт академиясига ўқишга киритиб қўйиши эвазига жами 8 минг доллар ва 43,5 миллион сўмни фирибгарлик йўли билан қўлга киритгани аниқланган.
Шу каби, департаментнинг Самарқанд шаҳар бўлими томонидан ДХХ ходимлари билан ҳамкорликда ўтказилган тезкор тадбирда Ш.С. исмли шахс фуқаро М.I.ни танишлари ёрдамида Тошкент шаҳридаги “Ренессанс” номли хусусий олий таълим муассасасига ўқишга киритиб қўйиши эвазига 2 минг долларни олган вақтида ашёвий далиллар билан ушланган.
Департаментнинг Сурхондарё вилоят бошқармаси томонидан ДХХ ва ИИБ ходимлари билан ҳамкорликда ўтказилган тезкор тадбирда эса М.Э. исмли шахс фуқаро Н.Н.га Россия ёки Тожикистон давлатларидаги олий ўқув юртида ўқигани ҳақида ҳужжатлар расмийлаштириб бериш орқали Тошкент шаҳридаги олий таълим муассасасига ўқишга киритиб қўйишни ваъда қилиб, эвазига 8 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.
Изоҳ (0)