Наманганда охирги 10 кун давомида ичимлик сувидан жами 6,7 миллиард сўм қарзи бўлган 5539 нафар абонент қарздорликни бартараф этиш бўйича талабномалар юборилган. Бу ҳақда “Дарё” мухбири Азизбек Абдувалиев хабар бермоқда.
Фото: “Наманган сув таъминот” ахборот хизмати
“Наманган сув таъминот” корхонаси мутасаддиларининг билдиришича, шу муддат давомида 3 миллиард сўмдан ортиқ қарздорлиги бўлган 2625 нафар абонент бир неча бор огоҳлантирилганига қарамасдан қарздорликни бартараф этмагани учун тармоқдан узилган.
Фото: “Наманган сув таъминот” ахборот хизмати
“Қарздор шахсларга аввалига талабнома юборилиб, огоҳлантирилади. Уч кун ичида ҳолат ўзгармаса кириш жўмрагига муҳр босилади ва тармоқдан сув бериш тўхтатилади. Шундан кейин ҳам тўлов амалга оширилмаса ёки ўзбошимчалик билан муҳр бузилса, абонент тармоқдан мажбурий тартибда ажратилади. Кейинги босқичда қарздорлик суд тартибида мажбурий ундирилади, — дейди “Наманган сув таъминот” ахборот хизмати раҳбари Тоирбек Комилжонов.
Фото: “Наманган сув таъминот” ахборот хизмати
Вилоятда ичимлик сувидан қарздорлик даражаси ўта юқори бўлган абонентлар ҳам аниқланмоқда. Жумладан, Наманган шаҳрининг “Дамбоғ” маҳалласида яшовчи фуқарода 37 миллион, Янги Наманган туманидаги “Соҳил” маҳалласида истиқомат қилувчи фуқарода 34 миллион, Давлатобод туманида “Ўрта Ровустон” маҳалласидаги оилада эса қарийб 25 миллион сўм қарздорлик тўпланиб қолган.
Фото: “Наманган сув таъминот” ахборот хизмати
Мутасаддиларнинг қайд этишича, вилоятда ичимлик сувидан қарздорлик бўйича энг юқори кўрсаткичлар ҳам айнан Наманган шаҳри, Давлатобод ва Янги Наманган туманлари ҳисобига тўғри келмоқда.
Изоҳ (0)