“Бугунги геосиёсий вазиятда битта давлатга таяниб бўлмайди” — бош вазир ўринбосари Жамшид Хўжаев

2030 йилга бориб Ўзбекистон ялпи ички маҳсулот ҳажмини икки баравар оширмоқчи. Бунинг учун мамлакат расмийлари АҚШ, Россия ва Хитой манфаатларини мувозанатлаштириши керак, деб ёзмоқда Bloomberg.

Тобора парчаланиб бораётган бугунги глобал иқтисодиётда Ўзбекистон учун бу осон иш эмас, таъкидлади нашр.

“Бугунги геосиёсий вазият шуни кўрсатмоқдаки, фақат битта давлатга таяниб бўлмайди, чунки бу хавфсиз эмас”, — деди Ўзбекистон бош вазири ўринбосари Жамшид Хўжаев. “Ҳар бир мамлакат диверсификация излайди”.

“Хитой бизнинг энг йирик савдо ва сармоявий ҳамкорларимиздан бири”, — деди Хўжаев шу ой Вашингтонда бўлиб ўтган АҚШ—Ўзбекистон бизнес конференцияси чоғида берган интервьюсида. “Биз буни яширмаймиз, чунки улар қайта тикланадиган манбалар ва яшил энергияга жуда ўч. Уларнинг яхши технологиялари, йирик компаниялари бор, қолаверса, улар биз билан ишлашни хоҳлайди”.

Шу билан бирга, Россия Ўзбекистоннинг энг йирик савдо шерикларидан бири бўлиб қолмоқда. Москва билан тарихий алоқалар бу муносабатларни мустаҳкамлаган. Бундан ташқари, кўплаб ўзбекистонликлар Россияда ишлаб, оилаларига пул жўнатади, деб қайд этди Bloomberg.

Хўжаев бу алоқаларни “яхши имконият” деб атайди, чунки ўзбекларнинг кўпчилиги рус тилида гаплаша олади. У, шунингдек, расмийлар ушбу бозорни диверсификация қилиш учун Европанинг бошқа мамлакатлари билан ишлаётганини айтди.

Қайта тикланадиган энергиядан ташқари, Хитой Ўзбекистонга инфратузилмани ривожлантиришда ҳам катта ёрдам кўрсатмоқда. Бу давом этади, деди Хўжаев. Аммо мамлакат АҚШдан инвестицияларни жалб қилмоқчи, айниқса, АҚШ компаниялари устунлик қиладиган ривожланаётган юқори технологияли секторга.

“Бизда бозор иқтисодиёти мавжуд ва биз барча инвесторларимизга бир хил шарт-шароитларни яратишга ҳаракат қилмоқдамиз”, — деди у. “Агар сизда энг яхши вариант мавжуд бўлса, унга интиласиз”.

Россиянинг Украинага бостириб кириши ортидан пайдо бўлган қийинчиликлардан бири АҚШ ва Европадан Россияга тақиқланган товарларни ташишни тўхтатишга уриниш бўлмоқда. Ўзбекистон бу товарлар ўз чегараларидан олиб ўтилмаслиги учун АҚШ Молия вазирлиги билан ҳамкорлик қилмоқда, деди элчи Фурқат Сидиқов.

Хўжаевнинг айтишича, Ўзбекистон бошқа давлатлар иқтисодиётнинг энергия ва озиқ-овқат таъминоти каби нозик тармоқларига киритаётган сармояларни диверсификация қилишга ҳаракат қилмоқда, бироқ инфратузилма каби бошқа соҳаларга келганда, расмийлар “халқ учун энг яхши деб ҳисоблаган ишни қилади”.

“Биз кимга ва қаерга сармоя киритишини буюрадиган даражада бой эмасмиз”, — деди у.